ABMSU tir khasetba SIT-i bushisüngdangtsü

Guwahati, August 4 (Agencies): Assam nung All Bodo Minority Students Union (ABMSU) tir Lafikul Islam tepsetba bushisüngdangtsü atema sorkari Special Investigation Team (SIT) ka tentettsü, ta Assam Chief Minister Sarbananda Sonowal-i metetdaktsü.
Sorkarisa iba tatalokba ya Central Bureau of Investigation (CBI) nem bushisüngdang südaktsütsü atema tebilemba lir.
“State sorkari CBI nem iba ken o bushisüngdang südaktsünür” ta Brahmaputra State Guest House, Guwahati nung ABMSU, All Assam Minorities Students Union (AAMSU) aser Bodoland People’s Front (BPF) lennirtem den senden ka amenba sülen Sonowal-i ashi.
ABMSU lennir asür Lafikul Islam’er kibong nem sen lakh 5 teyari agütsütsü. Ano iba tatalokba nung injang agi khashia yirur Subhankar Chakraborty nem sen 50,000 teyari agütsüba den medical expenses ajak sorkari menoktsü, ta chief minister-isa ashi.
Lafikul Islam tepsetba indang osang tejangja pai DGP Mukesh Sahay nungi metetpelatsü, ta paisa shisem. Iba lendong atalokli DGP Mukesh Kokrajhar tonga ao.
State sorkari Assam nung alirtem lendong nungi kümzüka ayutsü aser anüktsü tenangzükba agia lir aser iba tangatetba nung nokdaka lir. Aibelenertem aputsü atema mapa inyaktsü aser nübortemia yariteptsü mepishir, ta Sonowal-isa metetdaktsü.