Aboi, Mon nung kazütsü yangluba training ka agiogo

Aboi/Dimapur, Monupii/May 20 (TYO): Arrla 275(1) 2017-18 program nung ajemdaker Nagaland sorkar aser Ministry of Tribal Affairs kübok FPA India-i ayongzüka Aboi, Mon nung ita ka piyong Soft Toys (kazütsü oset) yangluba training ka agütsüba sülen Monupii 17, 2018 nü iba sentong takok ngua tembangogo, ta tanü ketdangsertemi osang ka ajanga metetdaktsü.
Iba training nung adener tetsür 130 nem training agiba certificates agutsüogo.
KNSK Aboi Unit Tir, Songmeth aser tongti tezülur, Threingyei nati certificates agutsü aser Tiri training agirtem dang teka mapa tasen angazükbaji maneni benshitsü aser shishilembaba dak sendakba maparen tenzüka inyaktsü ajungshia liasü.
Laisa training agirtem dang self help groups (SHGs) tenteta senotsü ajangzüktsü ajungshiba den külemi KNSK-ia nungita yaritsü, ta metetdaktsü.
Laisa, training agiba centres anasa mali aser senotsü aika agutsür, ajisüaka iba ama mapang ka nung training angati agutsüba atema sentong ayongzükertem aser tesayurtem dang pelar, ta lemsatep.
Training agirtem tenüng nung jembidang Pongchoi-ia FPA India aser trainers dang pelaba lemsatep.
FPA India Nagaland Branch nung General Manager, Vincent Belho-ia training agirtem dang maneni iba sempet arangshitsü aser mongin akumtsü ajungshiba den külemi Self Help groups tenteta awa-a oa inyaktsü ajungshia liasü.
Paisa training agirtem dang tanga sessions nung family planning, HIV&AIDS, Hepatitis aser birth control onüktem nung o lemtepba onüktem tu mamadoktsüla, kechiyong temang anema alibaji rongsen, aser temang anema melira tang teka mapa tasen angazükbaji ajanga senotsü majangzüktettsü, ta ashi.
Sentong ayongzükertemi Office of Additional Deputy Commissioner aser EAC Aboi, Vineikho Tetso nungeri lenla balala agi yariba aser KNSK Aboi Unit, Arogotem aser stakeholders-i yariba ajanga sentong takok nguogo, ta shia pelaba lemsatep.