ABPF pur 20 buba lokti senden temoatsü nung agiogo

Kümlong Baptist Arogo nung ABPF 20 buba lokti senden nung Rev. Maong Lemtur-i ketdangsüa Kibuba benjong agidang tangokba noksa angur.

Mokokchung, April 23 (TYO): Ao Baptist Arogo Pastor Fellowship (ABPF) pur 20 buba lokti senden sentong April 21 nungi tenzüka anogo asemnü tashi yangi Kümlong Baptist Arogo Mokokchung nung “Züngkümshidi” omen nung ajemdaker takok ngua kaogo. Iba sentong nung arogo 126 nungi tenzüker ajak agi 157 arua shilem agia aden.
Iba sentong nung Tsüngrem osangabenerji; OTS Dimapur Principal Rev. Dr. Wati Aier aser Dimapur Ao Baptist Arogo (DABA) Assoc. Pastor Rev. Maong Lemtur na liasü aser “Sannükerji Shiba?” ta asüba onük nung Kohima Ao Baptist Arogo (KABA) pastor Rev. Bendangmereni jembi aser “Santemi Sannüker nungi imlaba” onük nung CTC Aolijen Principal Rev. Dr. Mar Pongeni jembia liasü.
Tatembang sentong Deobarnü aonung DABA Assoc. Pastor, Rev. Maong Lemturi Tsüngrem osang bener arudang, Tsüngrem tanelai aniba nung tashi angaa anitakba den Pa mapa inyakba nung züngkümshitsü tayongzükba ka agütsü.
Paisa ashiba agi, Tsüngrem tenzükba mapa nung timtem jenti ajurutsü, aji oda, timtem tekangshi aser tatala jenti ajuruaka itemji ajangteta tenzüktsü asoshi ajangshiba kuli kar densema külem sannükertem ayongzüka liasü.
Tsüngrem tenzükba nung temulung tesadang agi masü, saka temulung ajunga agi Pa dak rangloker tenzüktsü asoshi paisa ajungshi.
Laishiba ya ochi aser taküm o lir, anungji, Laishiba bushiba nung tali züngkümshia Pa tenzüktsü asoshi ayongzüka liasü.
Taruba kümsük ABPF anitsü asoshi ketdangpurtemji; mendenbuba Diphupar Ao Baptist Arogo Pastor- Wb. Lipok Jamir, menden yariba Mangkolemba Baptist Arogo pastor- Dr. Akok Amer aser tezülurji Süngratsü Baptist Arogo pastor Wb. I.Kilen Longchar parnok shimogo.
Sentong balala nung Kümlong Baptist Arogo choir, Ongpangkong Arogo Pastor-tem, Dimapur Area Pastor-tem aser Jangpetkong Pastor-temi ken ajanga Tsüngrem osang bena liasü.