Abraham Lincoln awashi metetba nungtogo tamarener ka

~ A. Imdong Jamir, Sungkomen.

Tamangtir, America nunger Martin Luther-i ashi “Awashi ya tanüdangtsü mesük, koba nung taküm yimya ajak jongkai adoker”. Meimchir o meimchir na tsüngda nung apulatepba tesendaktep temeim mapa tajung tematiba ji AWASHI YIMYA tajungji lir. Tsüngrem nena tesendaktep, ner kibong o Tsüngrem na tesendaktep, ner Arogo o Tsüngrem na tesendaktep, tatishitsü agi anüdoklen Burma kin tamanger sensaksang-i kecha mashi. Kibuba tsüngremia kecha mashi, saka na aser ner kibong teyari Arogo ajanga yok. Arogoi pelar kibuba Tsüngrem sentsüwangshir. Iba awashi metetba mapa tajung putusaputu alitsü. 1876 Nov ita nung Dr. E.W.Clark-i Molungyimsen putupur ajanga Chungtia yimsüsür dangi senpak 5 (Tatsük) pongu bener yok. Iba mapa tajung awashi metetba meimchir temi tanü tashi amatsü makok kibuba Tsüngremi rizüngja lir. TAMAJUNG INYAKA TIM ATEM DANG NUNGIBO TAJUNG INYAKA TIM ATEM TAJUNGBA. Nüngdaksang, kiburi-i bo kecha mashi sürnung, par mechi nung maksüa ajuru, ola madok tekangshi-i ajurur. Tensa majungba mapang ata-mataka amer shirang semdangi mozüki-i aitang taochi makaba telok telok prangpong sa apur ajuruasa senzüogo. Kibuba Yisui ashi, kü tenung nung shibai tzüzü marok ka item tilatem nem agütsür ni koda-kang mamadaoktsü.
Tsüngrem yimli aser asen Ao yimli ayisü nung mesüktepa lir. Tarensen, tantsü tambu, anük, okü, mapa züngdang shi, shijip tilaka ken süa achitsüba mechi, awashi meteta agütsüba awashi memetet (kushi, kushi) nü mulungka agi agütsüba aonbu nung enoka koda maso, korema jashi, korema nem-nemerang aonpu-i yokba otsü lir. Asen Aor asoshibo yimli nung awashi, metetba aser memetetba kanga ret-reta bilemba kinji asen kin lir (Kanga tekümdangtsü tulu). Tsüngremi-a pa tsütsü pa yimli tsütsü, awashi memetetba, metetba ji pai kanga ret-reta bilemer. Matric final agütsüdang kinunger ajunga kua jipa sarasadem nung Tsüngremi meima anaprongla Division tajung nung takok angu. Tsüngrem nem tepela tenla agütsütsü melena tekülem sentepia marur aküm. Ita 5 tsüngda tanur ka ajungbena süadok, ka tatidang nung tsük. Küm ka shi lir, tetsüi toktsür asü. Temeim tazüngertem kibuba Tsüngremi pai meimba, pai aochiba mesen-metoi amshiba sempar aser kanga aroka jashir. KIBUBAI ASÜKUMER KIBONGJI SAMATSÜR. SAKA AMITSÜR ARRTSÜJI YANGLUTSÜR. A.Shin 15:25. Tenzüker, tenzükla tsüngda Arogo rongsen agi washi metetba mapa tajungji kanga tongtipang, tekülem kidang awashi makai amenba, awashi akhümtsübu kecha makai taaktsü makai sübor külemba, sübor ken atenba, metokzüa anünütep, alok-metsü aketeta amenba, memerüki tezük-nem menema sübor atua amenba, speaker tangbo mendenbulai talangba awashi memetet jembiba, choir masterbai ken sayuba tangbo teyanglushiba sayutsüngi talangba, tenzükla tenzüker kar nem sannukeri meshiteta sarasademtsü agütsü nung tensa, mapang tia koba asoshi sarasademdaktsünüa agütsü itemji nümdoka toker, tapulen ka oshilu tanener amai süli ano ken tenzükshili ta, ie- kiyir benjung sentep ka nung kibong tasen asoshi sarasademtsü agütsü (Devotional) tekülem sarasadem agiba ama. SARASADEM ya kibuba Tsüngrem den sensaksemba o taret temeshi o tanüla Tsüngrem mulongjang nung kongshia, yi jemer arua mensema alidang tepetzük tia nung akümli khuret bener arua mensema alila nunger ajak mulongjang nung kongshia sarasademtsüla. Asen sarasadem ola angashir pei mulongjang nung nüktzü ayimtsüsa, kibuba Tsüngremi agizüktettsüsa sarasademtsüla. Kodang Israel kin nüpori Ijipi ano meyiper lunua menongratepa jembi kibuba Tsüngrem kanga ainadok. Idangjisa MOSAi tetsungdai yia sarasadem.
TSÜNGREM O ISRAEL KIN NA TETSÜNGDAI AYIBA SARASADEM:
NI NÜ DANG MEPISHIR, NÜ IMLIBILEM ULUBA AMA IBA NUBUR TAI MENABA, ASER IJIP NUNGI TANG TASHI NAI IBA NÜBUR DANG TAI ADOKBA AMA TAI TOKANGMA-kibuba Tsüngremi Mosa sarasadem langzüa o ya jembi – “NE O AMATO NI TAI TOKOGO” Zu: 14:19,20
Imlaseta tekülem tempanga sannükeri sarasademtsü agütsüdang, sarasadem masüdang ni tanela mangdang ka anguba shidi ta sur nabo jangratema aji shia aor, lakseta menkanger alirtem pakzüka lua doker, gari tapu balala nung mener senshir. Tekülem sentepji Tsüngrem o jia kang tongtipang saka lokti ajak mechi Tsüngrem den sensaksemba sarasadem koba Arogo tekülem seplep, seplepa sarasademer temenen mupongi teti iba tekülem ki meinprong alitsü. America nunger George Muller sarasadem nung kanga dang takang tamangtir ka, pai lajar tsürabur malir tanur 2000 (merijang ana) mesüa liasü, asüngnepbo item 2000 tanur atema mamatsü teraka maka, amang tepiyong pa kanga khuretsa saaker 2:00 ako meta nungi lumia sarasadem dang, kima nungi America nunger mamatsü ayoker kati adianu, ozü mamatsü abenba gari tyre puncture sur lir, anungji mamatsü yaaa raksaa lir na agiang ta ashi nung Mulleri ni sensaker kecha makaba sarasadem yamai langzur na? ta jepa Tsüngrem nem tenüngsang agüja tanur 2000 tzüratema jemdaktsüba otsü lir. Kibuba Tsüngrem, temeim nung awashi meteta asen tepetzük tia nung alidang yamaji yarir. Nisung tsüngda nung, awashi akümtsübuji kang kanga senti lir. America nunger shi o ka nung yamai shia lir “Awashi ya tanüdangtsü mesük, koba nung taküm yimya ajak jungkai adoker.” Kisemtsüsem dak, tangar chiyongkiyong mereprangi jempoloker, moko, Sali, den tepu-tushia salibo tepangsünga mangamer ano mozü ki Clinic nung, sorkar office nung, tulur, Minister kidang, commissioner, director kidang langpang nung tongshi nung shinü nuloktsür kimabo Sali-metsü moshia toktsür akütsema mejaka aoba yimya nisungi sempaba aser jashiba tematiba awashi memetetba yimya tamajungtibaji itemji ta sükshir.
Sensaker tashi, tetsüng agi senzü, takar tashir gari nung senzür, aji alima yimya. Bolero nung amensangia amar kushi aser ta pa meyipnüdak meyiper,,, pa anennüdak pa kushi nung anentsü, (pa mulong ka) temeim kar akartem, pei kar ji ajemalua traffic rules-ji terabo akümtsübua alima ya asen meyong dang masü-kar awashi memeteti amshitepba yagi, kin ka tiaji sayur. Nü taküm jaklaji sayur. Tangar temelong yirudaktsüba, style standard nung pei mulongka agi yimkong mulong yirudakja nü kari amshibaji kanga konangbo masü. IBAI TSUNGREM TEMOATSÜ TETSÜNG AGI MEJUSHIBA MAPA KA LIR. Asür Moraji Desai Assam semdangi arudang among nung Johart area mongmirong ka nung pa tayimtsüji tim mesüi alua anen. Anasa Assamese nunger sensaker kibong kati Milen tejen ka tsüloka bener lua tamarener lendong nung alisang aniketa anisüngzükdakja tiptemtsü. Idangjisa P.M fund nungi sen meyirjang 50,000 agütsüba otsü lir. Temeim nung awashi metetba mapa tajung koda temoatsü. Alemli mapang kari Abraham o tebutsü na anüngdang sülemdongzüng nung mentepa alidang ajungbena ainer 3 (kotak tenyar) ama ajurutep nung tenati kanga ilong tetsüng depen shitokdaktsür kidangi aniketer chia jemdaktsü.Paul shidi-nung Paul shidi nung ainer dang temeim sayutsü tama, kechiyong aji agi memeteti kotak tenyartem aniket..
Palestine nunger o Israel na kanga sashia raradang, Palestine nungri Bethelem atsünger HQ küma alidang Dawid chubai Bethelem nung aliba tzüji tanga tera jemnnüali ta pai menungra jembi nung, tasütait sepoy anati Palestine nung atsüka nempoka tukor Chuba nem tzüji bener arua agütsü nung tammmarener Israel chuba Dawidi tzüji ajemtsü kanga apayua bilem, Tsüngrem dang aaka bilem südi, anungji chuba jagi taküm bendanga agüja bener aruba ya ni koda mejemli ta sür tzüji pai Tsüngrem tenüng nung shitokdang chubai Tsüngrem matsüngdang awashi metet tulu ka sayuogo.
Alima nung chuba tamaren aika kanga nungtugu tamarener aika soteta lir. Abraham Lincoln 16 buba American President shiba ayanger kibong ka nungi sotet. Otsü agi ashir, par kiji arempok, tsünglu agi teti senpangadang alir. Pa lanuwa tebu alu mapa nung teti yaria liasü. Tasemer mali, onsara sensakba agi pa kaketshidak moi anen. Anarongadena bena aruba kaketji amangtom nungi sangwazüka pai kakutji azüng pa dak metetnüba angazüknüba angashinüba, bushitetnüba, tzüra tzuraba tangar tamarener chir ama kümnüba sensaker tanulaji meremsepi akanga liasü. Tanü asen chirtem nüm kibuba Tsüngremi-i Roman nunger shisatsü, Greek nunger shisatsü tabensa agüja lir, saka lanurtemdak metetnüba, angazüknüba, tulur chir ama kümnüba tzüra tzüraba, yongyaba temulungjang nung doktepba tanüla, aya-tzüraba kecha mali.
Lasa lasa tera angazükba nung temulung lemer nükjidong maka alima pelaba, alima tobur ajung penzülen teimba mapang entoka azüngba agi tamakok korang semloker pei kidangi shilanger aika kümogo. Abraham Lincoln-i mapang talangka nungi alemli George Washington taküm otsüji pai züngnua bushi. Otsü agi ashir, iba kaket bushii mile 20 jajarang takar tanur ka dang apua ken azüngtsü meshir pelashishia aru. Apuer aruba kaketji pai zünger kidang ayubaji par azüki kilem tapok nungi tzunglu sena kaketji metensa nung takar tanurbajagi kanga junger iba kaket temenok na ozü lu-i arutsü. Takarnungba dang nung Abraham Lincoln sensak nungba tepelaba . kibubai auyi nungi sensaker mesor. Abraham Lincoln kenu store kelen mapa inyaka alidang sensaker ka kanga okronga sung suya lia pai asüngdang, kechi atema tanger süngya sotsür? Pai langzü ni tsüngsem jura ka alitsü sung ya asor, pai puji meshir Dollar ka jenjang gondha ka shi sutsür ashi, dollar kaji meshir oa tsüngsemji aliang. Kenü pa Tsüngsem meyua alidang par medemer ainer kati angu, President nabo nai tsüngsem meyur na? onok lima nungbo onoki tsüngsem memeyur ta kang süngmanga asüngdangba otsü lir. Alima nung kotak yimli yangeryonga aotsüba ya kibuba Yisu aser asenok kulemi mesüra meyangerteter. Bethani yimdak Mary o Martha tenu Lazar sür leper nung remer alidang kibuba Yisui par yimer dang ashi, nenoki longji mekupdokang. Idangyongji kibuba Yisu-a koker saka ali nunger mapaji tama asütsüla Kibong nung tebuti-i anir, temeim nung kati ka asoshi awashi metetba liba-liroyonga aoba kibuba Yisui atener. Kenü anogo Yihuda nunger Jairas takar ka jala süadok, tebuti-i shinga mebushi, obala kibuba Yisu bushia apusodi ta sur ao. Temeim akasang tebuti Yisu kong lir ? Ni ozü jala sür pa bushir, kibuba Yisu ki ka nung mena lia tasü khuret abensangi ashi, kibuba ozü jala ka tang suli, na arung ozü jala tasüla dak nu teka agi arua nemetang la shia arutsü. Idangjiyongi kibuba yisui apusoa mangyimsang tebuti sülenlen anidaka oa shia arutsü. Shirnoki ni nendaka bushir parnoki ni angutsü. A.Shin 8:17 (b). iba ama tensaji asen rokoi ajuru nung suogo ta pastorba dang shiang, kiyonger ongken atui yiang, ak kg 200 shi tangsa bushiang ta o tempangtsüba surnung, kibong telong nung akumtsubutep ajanga awashi metetba oba nu melen Hezira ji ni otsüdi ni? Ojala melen ni otsüdi ni. Iba ama telongjem teputep nung Tsüngremi adener. Arogo telong nung tanbo pastorba den ain jagi niang odi, shiranger aser tasür kidang jagi asenok tenzükla ajak oaki sarasademtsüdi ni? Arung asenokbo ata-mata temeim tenla sarutepba bener oa sarasademtsüdi. Tashi temeteter Mike Mardocki yamai ashi, kodang nü teka nung aliba saladir, Tsüngremi pa teka nung aliba na asoshi salatsü. Sensaker dang aria bilembaji Tsüngrem nem aputsür.
Tsüngremi yamai meimchirtem den jembir, kechiyong kin ajak madak asoshi kibuba anogo lir. Nai inyakba ama nedak inyaktsü, nai benshiba ama, nekolak dangi meyiba arutsü Oben…1:18
Temeim Khrista dak amangba purtem, alima tensa mongpu anogo shia tamajungba tamajungba akümer ta asenok ajaki metetjemogo. Tsungküm mongpu tamajung agi asenok meketbangogo. Kibuba Tsüngremi ya jembir, Tsüngrem lartem, temeshipurtem, mojingi kanga nendaka atidangtsü ta ashir. Tanüla temeshi makaba arogo tem nung tasüba tali aser rongrong tulu adoktsü, alima menenja chidiyongdir alima nungi taochi makai aika leptoktsü ta kibuba Tsüngremi ashir. Tamanger aika tatem o mejembijungi alima nungi bener aotsü ta tanülai ashir. Anungji asen tebok asoshi kibubai asen yari kechi agütsü, moatsü aji agi tenüksunger oda milen totzü menur alia bener arudang keyir benjung kibubai kotak kikumpang shipanger tesamatsü kima yimdong nung nokdaker rongnung matentsü asen ajak renema lidi. Amen.