ABSU-i Bodoland state atema mapa inyaktsü

Kokhrajhar, January 16 (Agencies): Bodo nunger maitsü, sobaliba, litsü aser yimtenren temetentem kümzüka ayutsü atema All Bodo Students’ Union (ABSU)-i Bodoland state balaka tentettsü takhangba agütsüshitsü.
ABSU delegate house-i central cabinet nem iba atema mapa inyaktsü tashi agütsüogo.
Sorkari Assam nung lisopurtem indang temeten aser maongka nung timtem agütsütsüsa mapa inyakba ajak anema All Bodo Students Union (ABSU)-i noktaktsü, ta ABSU president Promod Boro-i ashi.
“Nütsüng aika aser advance kintem ST list nung züngsemra, tang aliba lisopurtemi ali, yimten, shisaliok, mapa, rongsenkettsüng aser loktiliba nung timtem ajurutsü. Talisa, Hagrama Mohilary-i BTAD tesem nung kin 6 nem ST jenjang agütsütsü olen ka jembiba aitsür” ta ABSU president-isa ashi.
Parnokisa Lok Sabha nung Citizenship Amendment Bill 2016 agizükba onük benoka lemsatep aser iba Bill anema noktaktsü telemtetba agi.
Lisopur telok 30 teloktep nung parnok-a adentsü atema telem ABSU-isa bangzüngtep.
ABSU-isa “Mission Quality Education” ajanga Bodo medium education tajungba agütsütsü atema telemtetba agi.
BTC tanishir Hagrama Mohilary-i Bodoland state ka tentettsü atema Bodoland tesem nung infrastructure, industry aser IAS/IPS mali ta jembiba ABSU-isa aitsü.
Iba ya Bodofa UN Brahma, Premsing Brahma, Bir Silagang ama Bodo nunger lennirtem aser Bodoland movement atema taküm bendanga agütsür nisung 5000 mezüngmeshiba lir. Iba ajanga Bodo nunger temulung yirutsür, ta ABSU-isa metetdaktsü.