Abu Salem den nisung ana taküm piyong tepoukdak ayutsü

New Delhi, September 07 (Agencies): 1993 küm Mumbai nung bomb aika pokdakja amakba ken o nung tanü TADA court-i Karimullah Khan aser Abu Salem na taküm tepiyong tepoukdak ayutsü obendang agütsüogo.

Kasa ken o nung Tahir Merchant aser Feroz Khan na nem tasüba temerenshi agütsütsü aser Riyaz Siddiqui küm 10 tepoukdak ayutsü obendang agütsü.

Iba ken o nung court-i nisung trok aitsü. 1993 küm bomb aika pokdakja Mumbai amakdang nisung 257 tepset aser nisung 713 yirua liasü.

Iba ken o nung densema alir Mustafa Dossa bo taküm June 28 nü asü, ibayongji pa anema benokba ken obo shibanga liasü.

CBI-i ashiba agi, iba ken o nung 2015 küm July ita nung alenseta südaktsüsang, Yakub Menon dang nungibo Dossa-i shilem tamajungba agia liasü.

Mumbai amaktsü atema asalentong yanglur tongtitemji Dossa, Merchant aser Feroz nunger liasü, ta CBI-i tamalen metetdakja liasü.

Taküm June ita nung iba ken o angadanga aibelenertem aitsüba den parnok nem temerenshi agütsütsü atema jembia liasü aser August 10 nü tembanga liasü.

Parnok ajakji asalentong tamajung yangluba, sorkar anema rara ayongba aser nisung tepsetba ken otem nung aitsü.

2007 küm iba ken o angadangba mapang nung TADA court-i nisung 100 nem tai tonglokja liasü aser nisung 23 anemabo aibelen kuli menguteti chiok.

1993 küm March 12 nü bomb amshia Mumbai tesem balala amakdang nisung 257 asü aser nisung 700 dak tema yirua liasü.