Abu Sayyaf teloki yimjung atema jembitsü ayongzüker: Duterte

Manila, November 25 (Agencies): Philippines sorkar anemer tongti telok, Abu Sayyaf kiralongrartemi nüburtem nem lendong bener arutsüba aser nüburtem tashiyim agi apuba maparen anener, sorkar den yimjung atema jembitsü tayongzükba olen ka Philippines Tir, Rodrigo Duterte-i tanü, Hokolbar nü sangoktsüogo.
“Abu Sayyaf telok den yimjung sentong agitsü tamakoktsü,” ta shia, Duterte-i par telok meshimeshia samatsütsü tenangzükba ita ishika tejaklen metetdakja liasü saka pai tan lenji oa, Islamist telok den yimjung atema jembiteptsü lenmang lapoktsür lir.
Abu Sayyaf telok mita, makdoktsü nükjidong nung Philippines sorkari par mitkar züngsem 10,000 tashi yoka, Philippines anülulentip tsütsü kiralongrar mita amaktsü mitkar mapatong kanga sashia tenzükja lir.
“Ni tashiyim amshia, Abu Sayyaf anema raratsü koka lir. Par telok meshimeshia samatsütsü atema bomb tesashi amshitsüsa koka lir. Ajisüaka, yamaji inyakba ajanga yimji yimjung bener marutsütsü aser iba tangatetba nung ni par telok den yimjung atema jembitsü lenmang lapoktsür lir. Ni par telok den tesem mashika nung tsüngdong ajuruteptsü mulunga lir,” ta Duterte-i osang jangjashitsü.
Abu Sayyaf teloki par tesepti, Jolo aser Basilan asetkong na nung bendanger timba densema, nisung 22 tashi tashiyim agi pua yua, parnok chioktsü melena sen meyirijang jenti akhangba osang bushiteta lir.
Par teloki taküm 2016 küm tetenzüklena tashiyim agi pua ayur Canada nunger nisung 2 tekong tangja tepsetba sülen alima ajungai par telok aija liasü.
Philippines ajunga nung federal yimsüsütsü yimya benoktsü nükjidong nung Duterte-i Abu Sayyab telok dak alaka, Maoist sorkar anemer densema, Philippines sorkar anemer telok ajunga den yimjung senden amentsü ayongtsü tenzüka lir.
“Ni Basilan asetkong nung mozüki ka renemtsütsü. Iba mozükidang inyakertem tashiyim agi pua mayutsü atema Abu Sayyaf telok ajungshir. Nür teloki mapang tatsüka atema danga yimjung mapang asangsang nung lidaktsüra, nür telok den yimjung senden amentsü mulunga lir,” ta pai nenshia ashi.