Abu Sayyaf telungpur samatsütsü nangzüker: Aquino

Manila, April 27 (Agencies): Philippines Tir, Benigno Aquino-i mitkar tashi amshia Abu Sayyaf Islamic telungpurtem meshimeshia samatsütsü tenangzükba olen ka tanü, Bodbar nü sangoktsüogo.

Abu Sayyaf telungpurtemi tashiyim agi pua ayur Canada nunger ka tekong tangja tepsetba sülen tekolakji yangko ka nung seper Philippines anülulentip tsütsülen, Jolo yimti yimdong nung tan Hombar nü yutsüba osang bushiteta lir.

Par teloki pua alirtem chioktsü atema akhangba sen magütsüba yong Canada sensosangji tepsetba osang jangjaogo aser par teloki tanga bendanger nisung 20 dak tema tashiyim agi pua yua aliba osang bushitetogo.

“Iba amala lendong tia nung takoksa ajurutsü. Ajisüaka, Abu Sayyaf telok aser par teloki bener arutsüba lendongtsüdong meshimeshia samatsütsüji tongtipangba lir,” ta Aquino-i metetdaktsü.

Abu Sayyaf teloki tan tepsetsangji Canada nunger John Ridsdel aliba osang jangjaogo aser Abu Sayyaf teloki Ridsdel yacht rong ka nungi ita 7 tejaklen tashiyim agi apuba osanga bushitetogo.

“Philippines nübur ajunga amokmerentsü nükjidong nung Ridsdel tepsetogo. Ajisüaka, Abu Sayyaf teloki asen kodanga amokmemerentettsü. Yimjung asoshi jembitsü atema tejangrar ajunga den ajurutepa senden amentsü mulunga lir saka tashiyim amshirtembo ozüngi melaba ama merenshitsü,” ta Aquino-isa ashi.

1970s mapang nungi tenzüka Philippines sorkar anema tongpang rarar Muslim telungpur telok nungi Abu Sayyaf telok ya poktetba osang bushiteta lir.

Par teloki Islamic State (IS) ta ajaba kiralongrar telok tetsüti den sentakteptsü nangzüka lir saka par teloki sen meshizüka agitsü nükjidong nung nüburtem tashiyim agi pua ayuba maparen timba inyakba osanga bushitetogo.