Academic mapa nung tali temulung agüjang: Pro-Vice Chancellor NU

Pro-Vice Chancellor Nagaland University Prof. R C Gupta den kaket zülur aser tesayurtem külemi Nagaland University Kohima campus Meriema nung Rongchii 10, 2018 nü tangokba noksa nung angur.

Dimapur, Rongchii 10 (TYO): Pro-Vice Chancellor Nagaland University, Kohima Campus, Merima indang office chamber nung Rongchii (April) 10, 2018 nü kaket sayaba sentong ka agi.
Department of Education nungi tesayurtemi züluba kaket asem sayatetba ya tejak tentetba mapang ka lir, ta Pro-Vice Chancellor, Nagaland University, Prof. R C Gupta-i iba sentong nung jembiba mapang ashi.
Tesayurtemi khuret, tebilemtsü, perimeter indicator, quality indicator aser tang tensa nung khuret balala nung ajemoka inyakba mapang item kaket ajanga yaritsü, ta pai ashi. “Tesayurtemi academic mapa nung tali temulung agütsütsüla aser asenoki inyakba mapa tajung nung arishi küm agi kecha timtem magütsütsü. Shisatsü ya kodanga matemer anungji tesayurtemi tarutsü nunga seminar aser project work tem tali ayongzüka akatsüla,” ta NU Pro-Vice Chancellor-i ayongzük.
Nagaland University-i takok anguba indang jembiba mapang, 2018 nung linük tesem ajunga nungi National Institutional Ranking Framework (NIFW) agidang, university 750 rongnungi Nagaland University jenjang 95buba ngutet aser terenlok tulu lir, kechiaser 2016 nung NU ya jenjang 227buba nung liasü, ta Prof. R C Gupta-i ashi.
Nagaland University nung teaching aser non teaching staff tem teyari medeni iba takok ya monguteti lila aser tarutsü nunga NU-i tajungtiba nung maparen balala inyaka jenjang 50buba tongtettsü merangtsü, ta pai shisem.
Kasa sentong nung Education Department nungi HOD, Prof Lungsang Zeliang-i jembiba mapang, item kaket azüngba ajanga subject matter nung tesayurtem tajangzük anguba kisüng masü, saka jembishinü tajungba akümtsü aser tali bendanga agütsür mapa inyaktsü, ta ashi. Iba mapa takok ngutettsüsa külem tesayurtem aser talisa Pro-Vice Chancellor-i shisatsü nung yaria len aniba asoshi pelar, ta lai metetdaktsü.
Volume asem aliba kaket ya Prof Lungsang Zeliang, Narola Chuba aser Dr M Rajendra Nath Babu nungeri zülu aser APH Publishing Corporation New Delhi ajanga publish asü.
Mezüngbuba volume, Teacher Education-Issues and Challenges nung unit pezü lir aser iba kaket nung Quality Teacher Education, Innovative Strategies & Practice in Teacher Education, ICT in Teacher Education amala indang zülua lir.
Tanabuba volume, Quality Concerns in Teacher Education nung unit pezü lir, koba nung Teaching Skills aser Skill Development, Life Skills & Soft Skills through Teacher Education Programme, Role of Guidance and Counselling in Teacher Education Programme amala zülua lir.
Iba kaket volume asembuba ya Teacher Education-Quality Indicator lir aser iba kaket nung unit pezü lir, kong Issues and Challenger in Teacher Education, Assessment and Evaluation of Teacher Education, ICT in Teacher Education amala zülua lir.