ACAUT, CNTC & UNTABA temi R.N. Ravi den ajurutep

Dimapur, July 7 (TYO): Naga yimjung olemtep nung India sorkar atema nung jembitsür, R.N. Ravi-i anogo asemnü atema Nagaland semdangi arua lir, aser Hokolbarnü pai Police Guest house, Chumukedima nung Naga civil society tem den maneni ajurutepa sendentem menogo.
Ajisüaka, tanü Ravi-i media denbo majurutepi dang senden amenba tesem toktsür oadok.
India sorkari Naga nunger ajaki agizüktettsüsa telemtetba ka agitsü atema kanga dang süoki ia bilema mapa inyaker ta Interlocutor-i onok dang ashi, ta ACAUT-i pa den senden amenba sülen osangbener dang ashi.
ACAUT-i Interlocutor dang Naga yimten tebilemtsü atema telemtetba agiba nung yimten telok ajak aser tribal lennirtem ajak adentsüla ta senden nung nenshia metetdaktsü.
NSCN-K dena olemtep alitsü atema India sorkari mapa inyakdar ta Interlocutor-i ashi, ta ACAUT-isa metetdaktsü.
Central Nagaland Tribes Council (CNTC)-ia Interlocutor dang telemtetba agiba nung telok aser sendaktepa alirtem ajak adentsüla ta nenshia metetdaktsü.
R.N Ravi-i Naga civil society ajak den ajurutepa tebilemba aser tangatetbatem angadangtsü merangba atema CNTC-i pa nem tenüngsang agütsü.
India sorkari küm aika mebentetteti aruba Naga yimten tebilemtsü angatetteptsü atema nendaka inyakbaji kanga tajung aser iba mapa atema parnok nem tenüngsang agütsür, ta parnokisa shisem.
Naga nunger telungpur telok balala tsüngda nisung tepsettepba inyakyim agi Naga nunger laktetogo aser yimjung aginür. Naga lima nung teti atema yimjung bener arutsü aser angatetteptsü atema, telemtetba agiba nung telungpurtem/telok ajak dendaktsütsüla ta CNTC-i senden nung R.N Ravi dang nenshia metetdaktsü.
Külen, United Naga tribes Association on Border Areas (UNTABA)-ia Hokolbarnü Interlocutor R.N Ravi den senden amendang, Assam ketdangsüba kübok aliba Naga nunger lushi ajak Naga nunger ket nung meyipa agütsütsüla ta takhangba agütsü.
1940s tatemlen aser 1950s tetenzüklen Naga yimten maparen tenzükba onüktem rongnung Naga nunger lushi meyipa magütsüba onük ya ka liasü, ta parnokisa metetdaktsü.
Yimten ken o telemtetba ka agidang lushi ajakji Nagaland nem meyipa agütsütsüla. Assam den arrtsü mebenteti yimten telemtetba ka agira, taoba Ahom yimli aser Naga nunger tsüngda putiotsüji tetezü mali aser amajok ka ama dang asütsü, ta UNTABA-isa Interlocutor dang ashi.