ACAUT-i ayongzüker; DDCF, DUCCF & CNTC nungeri ajungmesor

Dimapur, August 23 (TYO): August 25 nikongdang 3:30 ako nungi agitsü aliba sentong nung adentsüpurtem ajak jelia tesem tonga arutsü mepishir, kechiyong Dimapur nung traffic timtem lir, ta Media Cell, ACAUT Nagaland-i tanü sangdong ka nung metetdaktsü.
Iba sentong asoshi DDADU (Dimapur District Auto rickshaw Drivers’ Union) aser DDPVODU (Dimapur District Pick-Up Van Owners & Drivers Union) nati pickup & dropping teyari agütsür.
Pick-Ups ji old Dhansiri Bridge; Kuda Village, Purana Bazar, St, John School junction, Firing Junction, Burma Camp/Veterinary Colony; Nepali Khashiram/Rangapahar; Signal Junction, near Sub-Urban PS; DDSC Stadium, aser DC office junction tem nung alitsü. Iba sentong asoshi yaritepba auto aser pick-up garitem nung poster alitsü, ta Media Cell sangdong ka nung metetdaktsü.
August 25 sentong nung o jembitsüpurtem rongnung CNTC, KCCI, AKMWP, International Border Area People’s Organization, IMTN, aser DUCCF lennirtem dena lir, ta parnokisa ashi.
Maneni, Nagaland Motorcycle Club, United Riders Motorcycle Club, The Tribe aser United Royal Riders’ den ano kija shirnokisa iba rally atema sentong tulu ayonga agiogo, nenok ajak dang kanga pelar, ta ACAUT Nagaland-isa metetdaktsü.
ACAUT Nagaland-i nenok kija shia dangi tsüngdong arua pelar ta meshitettsü saka nenoki Naga nunger atema bendanga agüja inyakba mapaji kodanga mamatsü. Maneni, sentong nung nisung ajaki pei pei banners aser posters bener arua shilem agitsü mepishir, ta Media Cell sangdong nungsa metetdaktsü.
DDCF:Dimapur District Citizens’ Forum (DDCF)-ia sangdong ka nung ACAUT Nagaland-i ayongzükba rally pusema nungiter ta metetdaktsüogo.
Iba sentong nung Nagaland nung aliba senso aser talisa Dimapur nung alirtem ajak adentsü mepishir ta Media Cell, DDCF-i metetdaktsü.
DUCCF: Dimapur Urban Council Chairman Federation (DUCCF)-isa sangdong ka nung councils, colony lennirtem, tetsür, lanur aser public den Dimapur meketa aliba yimtsüngtem nungi nisung ajak ACAUT all Nagaland Public Rally nung arua adentsü ayongzüker, ta metetdaktsüogo.
Iba rally ya ochimashi anema Naga nungertem ola asütsü, anungji Naga public ajak arua adentsüla. Iba otsüsütsü sentong nung tetsür aser tebur arishi küm 15 nungi 90 tsüngda alirtem ajak adentsü ayongzüker,
DUCCF-isa Naga nunger masürtem aser talisa ward 17 & 19 kübok alirtem ajak iba sentong nung arua adentsü ayongzüker. Dimapur Auto Union-i mapa tajung inyakba atema DUCCF-i parnok nem tenüngsang agütsür.
Asen tarutsü tajung ka atema public ajaki ghonda asem jibosa agütsütsüla. Shirnok iba sentong nung shilem magidir, parnoki lenmang majungba, apu chirepba amala onüktem jembitsü temeten mali. Anungji asenok ajak longjemer Nagaland melenshidi, ta DUCCF-i ayongzük.
CNTC: Central Nagaland Tribes Council (CNTC)-i Ao Senso Telongjem Dimapur, Lotha Hoho Dimapur, Western Sumi Hoho aser CNTC kübok kaketshir telok ajak dang August 25 ACAUT rally nung adentsü metetdaktsüogo.
Tangatetba shitak aliba senso ajaki iba sentong nung adentsüla aser talisa nübortem asoshi inyakba civil society ajaki iba sentong nung shilem agitsüla, aji mesüra iba telok tentetbaji tetezü mali, ta Media Cell, CNTC-i sangdong ka nung metetdaktsü.