ACAUT-i Chief Secretary dang mepishir

Dimapur, April 15 (TYO): Rural Development department-i senotsü ketdangsüa amshiba aser talisa MGNREGA Central fund amshiba indang CBI nem bushisüngdang südakjang ta ACAUT Nagaland-i Chief Secretary dang shidi ka nung mepishia metetdaktsüogo.
Iba onük nung aibelenertemji Indian Penal Code, 1860 aser Prevention of Corruption Act, 1988 kübok ken o angadanga temerenshi agütsütsü mepishir, ta parnokisa shidi nung ashi.
MGNREGA kübok senotsü lemzüktsüba agitsü atema Rural Development Department nung ketdangser kari yimjak nung Medziphema Village Council nungi blank cheques meshiba osang angazükogo aser iba ya ozüng alema inyakba aser kanga tim masüba inyakyim ka lir.
March 24, 2017 nü Medziphema Village Council sessional Chairman aser sessional Secretary nati osangkaket balala nung Rural Development Department ketdangsertemi parnok nem blank cheques nung sign südaktsüba indang osang metetdaktsüogo.
Ketdangsertemi tashiyim agi Chairman aser Secretary dang nungi cheque tazünglaji meshiba liasü aser March 18 nü Lokti senden amendang, VDB Secretary aser Chairman Medziphema Village Council nati joko kodanga Rural Development department nem cheque tazüngla magütsütsü telemtetba agi, ta ACAUT-isa Nagaland Chief Secretary dangi züluba shidi nungsa shia lir.
Tang nungi cheque nung beneficiary indang tenüng, sen tangutsü tim aser fund/money amshiba indang osang tejangja alitsüla, ta Medziphema Village Council-isa telemtetba agiba osang metetdaktsüogo.
Department-i mesüra officer/BDO temi department indang maparen inyakba atema blank cheque meshiba inyakyimji ozüngi memelar aser iba ya department aser ketdangsertemi tashiyim agi village council madak mapa inyakba ka lir. Anungji, Medziphema Village Council indang onük dang masü saka department aser ketdangsertem iba mesükba ozüng alema inyakba mapa bushisüngdangtsü atema CBI nem mapa nunglokjang, ta ACAUT-i Chief Secretary nem takhangba agütsü.