ACAUT-i Mkg police & administration ayongzüker

Dimapur, October 7 (TYO): OKM-i ken o benokba sülen District Administration aser Police-i Sungkomen Ward nung totzü ayokdak shibangtsübaji ozüng alema inyakba mapa tuluka nung shilem tila ka putetba dang lir.
Iba kasa totzü ayokdak ozüng alema totzü meyoktepba ayoker ta osang angazüker, anungji police aser administration-i jungjunga bushisüngdangra iba kulijia bushitettsü akok, ta Media Cell ACAUT Nagaland-i sangdong ka nung metetdaktsü.
Dimapur nung ozüng alema totzü meyoktepba putetba sülena, iba amai temulung ulua mapa inyakba ya Nagaland nung ozüng amertem aser public mezüngmeshiba lir.
Bangdak ketdangsertemi totzü ayokdak kibur Rai Bahadur Chunilal & Sons aputsü aser ozüng tapet agi merenshitsü temepishiba agütsür. Ketdangsertemi totzü tendangtsü atema Guwahati-i dang masü saka Hyderabad nung mesüra tangalen aliba labs-i yoktsü mepishir, ta ACAUT-isa ashi.
District administration-i Mokokchung nung ozüng alema totzü meyoktepba maparen yimjak nung putettsü merangtsüla. Ano, SIT-ia ozüng alema totzü meyoktepba ken o bushisüngdangba ya Dimapur adener Zunheboto aser Tuensang nung aliba totzü ayokdak tesemtem dena bushisüngdangtsü ajungshir, kechiyong item tesem nung totzü tamajungba angur, ta parnokisa shisem.