ACAUT-i Naga Hoho madenba atema sasar: Senso ajak arua adentsü mepishir

Dimapur, September 8 (TYO) : September 12, 2015 nü ACAUT Nagaland-i DDSC stadium, Dimapur nung külem sabang sentong ayongzükba nung Naga HOHO medentettsü ta angashiba atema sasa bilemer.

Naga Hoho-i ashiba onüktem akhümtsübua agizüker saka iba sentong ya tang Nagaland tensa dak sendakba nung alitsü atema dang ayongzüker anungji Naga Hoho-i tsübua mesüra arentaka mebilemtsüla, ta ACAUT Nagaland sangdong ka nung metetdaktsü.

Naga nunger puti otsü nung Naga nungertem külem sabang ka nung tebilemba lemsateptsü kanga nüngdak aser tongtipang ta angateta ACAUT Nagaland-i iba sentong ayonger. Ajisüaka Naga nunger aikati külem sabang ka nung noktaker tebilemba aser shisatsü lemsateptsü memulungba angudang kanga nemjema bilemer, ta sangdong nungsa shia lir.

Linük yangerba maparenji loktii meteta tema nung olemtep lia inyaktsüla aser iba tangatetba prokshitsü atema külem sabang alitsü ayongzüker. Naga nunger yimsüsüba mapa nung kija katia shilem agiba temeten mesamadaktsütsüla ta tangatetba nung ACAUT Nagaland-i iba sabang nung tashitemetetertem aser mongin nisungtemi parnoki tebilemba lemsateptsü atema ayonger.

Naga Hoho-i international conference ka alitsü ayongzükbaji pelashishia agizüker aser iba amaji tilatiba jenjang nunga mungdang ayongzüka alitsübaji tongtipang lir, ta ACAUT sangdong nungsa shia lir.

Naga tebilemtsü ya Naga nunger ajak atema lir aser iba onük ya yimjak nung lemsateptsüla. Pei temeten angateta aliba senso ajaki September 12 nü Common Platform nung arua sentsü mepishir, ta ACAUT Nagaland-isa metetdaktsü.