ACAUT-i NSCN-IM dang telangzüba meshir

Dimapur, June 18 (TYO): Dimapur aser Kohima tsüngda 4-lane mapa inyakba contractor tem indang osettem rongdoktsütsü amokmeren ta osangkakettem nung sangdongaka, NSCN-IM tsütsü nungi iba dak sendakba osang kecha malinung ACAUT Nagaland-i iba nung NSCN-IM züngsemtem dena lir ta bilemer.
Ajisüaka, ACAUT Nagaland-i NSCN-IM nem anogo asemnü tsüngda telangzübatem agütsütsü atema mapang atakzüktsür, ta Media Cell sangdong ka nung metetdaktsüogo.
“Asian Highway-1 nung four lane yangluba contractor tem dangi NSCN-IM-i tashiyim agi saru meshi asü? Meshia lira, nenoki India sorkar den yimjung olemtep tatembang kati maru tashi Nagaland nung terenlok mapa inyakba ajak nokdangtsü indang tebilemba kar lir asü?” ta ACAUT-i NSCN-IM dang asüngdangogo.
NSCN-IM nung ochimashi züngsem kari kari 4 lane mapa anentsü asü. Iba ya shitak süra, nenoki ochimashi züngsemtem dak kechi mapa inyaktsü aser Nagaland nung alirtemi metettsü atema nenoki ochimashi züngsemtem indang temetettsü aser parnok inyakba menden yimjak nung metetdaktsütsü asü? ta ACAUT-isa asüngdang.
NSCN-IM-i anogo asem tsüngda temalen agüja aliba onüktem atema telangzüba agütsütsü takhangba agütsür. NSCN-IM-i mapang agütsüba tsüngda telangzübatem magütsütetra, parnoki Nagaland nung terenlok mapa meinyakdaktsünür ta angajemtsü aser timtem odangsa agütsüra, ACAUT-i bangdak ketdangsertem dang mepishitsüsa akümtsü, ta Media Cell sangdong nungsa metetdaktsü.
Maneni, Maytas-Gayatri aser NCSU-i kechi südir süaka mapa inyakba manentsü atema mepishir. Naga nungertem atema lenmang tongtipang yangluba nung tetsükdaktsü maludaktsütsü saka tajungtiba nung yanglutsü ayongzüker. Külen state sorkaria ola madoki melii, Naga public dang mapa nung tetsükdaktsü majurutsü ta tenangzükba agiba sangdongtsü ayongzüker, ta ACAUT-isa ashi.
Western Angami Public Organization-i taoba mapang lemtetba nung ACAUT-ia pusema nungiter. AH-1 yangluba mapa nung nisung shinga nema tetsükdaktsü bener marudaktsütsü ta parnoki lemteta lir.
ACAUT Nagaland-isa Naga Yimten telok 6 indang Working Group-i Nagaland nung aliba public dang, AH-1, Nagaland sector 4 lane yangluba mapa nung saru memeshitsü ta sangdong agütsütsü ayongzüker, ta Media Cell-isa metetdaktsü.