ACAUT-i NTC nem tenüngsang agütsür

Dimapur, November 28 (TYO): Tawa High Court (HC), Kohima bench-i State Vigilance Commission (SVC) nem tanaben tashi agütsür ta obendang agütsübaji ochimashi anema raraba maparen nung tongtipang onük ka lir, ta ACAUT Nagaland, Media Cell-i sangdong ka nung metetdaktsü.
Nagaland Tribes Council (NTC)-i State sorkar anema Public interest Litigation (PIL) benokba ajanga SVC tanaben tashi angu aser state sorkarji tepo maliba temang ka amai kümogo, ta sangdong nung shia lir.
Kasa sangdong nungsa ashiba agi, NTC-i benokba PIL pusema obendang agütsüba nung SVC-i parnoki tangatetba dak ajemdaker lemtetba agitsü tashi balaka den legal power meyipa agitettsü ta latettsüogo aser iba ya ochimashirtem anema lir aser iba ya Naga nungertem asoshi takok tulu ka anguba lir.
HC-i June 8, 2016 matong dang nungi SVC-i bushisüngdangtur anendaka aliba maparen ajak tanaben tenzüktsü tetuyuba agütsüogo, aser ibaji ajanga sorkari inyaknüba ama inyakba anogotem joko süitemogo ta angatettsüla.
NTC-i Naga nungertem ajangzüktsü atema bilema kanga bendanga inyakba aser lenmang teindangba ajanga dang ochi obendang nguteter ta sayuba atema ACAUT Nagaland-i parnok dang kangasa pelar, ta sangdong nungsa shia lir.
Tang tenokdangba agiener külen joko SVC-i parnok ket nung anendaka aliba ochimashi ken o tem tembanga inyaktettsü asü masüar repranga atar, ta ACAUT-isa ashi.