ACAUT-i State Vigilance Commission dang akhanger

Dimapur, July 8 (TYO) : June 27, 2016 nü Dimapur police, district administration aser ACAUT yaritepa ozüng alema totzü meyoktepba tesem 6 makdokba mapaji State Vigilance Commission (SVC)-i züngzünga angaoker mapa inyaktsüla. Ajisüaka, SVC-i mapa inyaktsü melena iba dak sendakba ken o ka parnok matsüngdang benoktsü atar, saka parnoki iba onük asoshi mapa kecha meinyakra, parnok teinyaktsü mapa meinyak ta züngshitsü, ta Media Cell, ACAUT Nagaland-i tanü sangdong ka nung metetdaktsü.
Taoba mapangtem nunga SVC-i parnok mapa shitak meinyak lir aser item rongnung, 2014 küm Dimapur nung Excise Department-i yi raksa endokba mapang sen lakh 30 dak tema jenjang yi maliba indang ken o dena lir.
Iba ken o ya ACAUT-i benok aser SVC-i Excise Department nung tongti ketdangsertem kar kümzüka ayutsü mechi nung constable aser lower ranked officers kar dang mapa nungi anentsütsü atema shidanga liasü, ta ACAUT-i ashi.
2015 nunga ACAUT-i BDO 36 backdoor appointment asüba indang ken o ka benok saka tongti ketdangsertem aser yimsüsür chirnurtem BDO shimoka aliba ajanga State Vigilance Commission-i iba ken o atema bushisüngdang mesüi dang toktsü, ta parnokisa metetdaktsü.
Ano, taküm küm tetenzüklen, CAG Report nung ajemdaker ACAUT-i F&CS department nung sen crore 402 tim mesüi amshiba ken o ka benok. Iba ken o nung PDS items ozüng alema belenzüka amshiba inyakyim densema liasü, saka iba ken o bushisüngdang mesüi dang süitemogo, ta Media Cell sangdong nung shia lir.
SVC-i ken o tulutem takok ngua bushisüngdang mesütetba reprangteter aser talisa parnoki tongti ketdangsertem aser yimsüsürtem sendaka aliba ken o tem atema bushisüngdang masür. Iba nung ajemdaker ozüng alema totzü meyoktepba ken o atemaa parnoki mapa kecha meinyaki dang toktsütsü ta bilemer.
SVC ya mapa meinyakba aser tashi maliba department ka aser parnok dak state indang senotsü amajok nung endoker, ta Naga nunger public-ibo bilemer aser iba jagi SVC ya mali tajungba asütsü ta bilemer.
Ozüngi melaba ama tentetba telok ka sayua SVC-i mapa inyaktsüla ta ACAUT-i takhangba agütsür. SVC-i ozüng alema totzü meyoktepba ken o kanga junga bushisüngdangtsüla aser iba nung SK oil tim mesüi amshiba kuli lir, anungji parnoki F&CS Department nung tim mesüi inyakba kulitem bushitsüla, ta ACAUT-isa ashi.
Ozüng alema totzü meyoktepba dak sendakba nung Dimapur police-i bushisüngdang südar, anungji SVC-ia sensaker nem agütsütsü lemzüktsüba SK oil kodaser F&CS Department-i meteta iba inyakyim nung amshi ta asüba kulitem bushtitsüla. SVC-i iba ken o atema mapa kecha meinyaktetra, SVC nung staff aser züngsemtem ajaki SVC tenüng memenükdatsüi pei mapa nungi anentsüla, ta ACAUT Nagaland-isa takhangba agütsü.