ACAUT-i yimozülurtem dang pelar

Dimapur, Nov. 23 (TYO) : Naga nungertemi election timi agitsü asoshi nokdakba tongpang nung pu sema osangkaket tenet nungi yimozülurtemi tang nungi putu mendeni aser lokti tentettemi election nung candidate ka yaritsü shimtetba osang madoktsütsü lemtetba jagi teyari tuluka angutsü ta tanü sangdong ka nung ACAUT teloki parnok nüng sanga metetdaktsüogo.
Osangkakettem ya alima nung loktiliba nung temelenshi bener arutsür tongtibang ka asünungji, iba ama telemtetba jagi Naga nungertemi election mapang sen yong pei temeten ayokba mapatem nung temelenshi adoktsü imlar ta parnokisa ashi.
Election tim mesüi agiba mapatem anema raraba tongpang nung raratsüba ya ajak shilem lir aser NBCC teloki tenzüker inyakba nung teyari tuluka nguogo aser ano iba maparen nung ACAUT telokia yimtsüng 1200 nung putu menden mendenbuba dangi election nung ochishia shilem shitak agitsü aser Election Commission-i dena Nagaland nung tiyazü vote 4,00,000 ( lakh pezü) lir ta yimjak nung metetdaktsübaji endoktsüsa ajaki shilem agitsü kanga nüngdaker ta ACAUT telokisa metetdaktsü.