ACAUT-ia Dimapur nung ‘lease system’ magizüker

Dimapur, September 27 (TYO) : Municipal Affairs Department-i October 2016 nungi DMC tolls nung lease system tenzüktsü ta tetuyuba agütsüba anema lokti atema inyakba teloktemi noktakba nung ACAUT-ia pusema nungiter, ta Media Cell sangdong nung metetdaktsü.

September 19 nü sorkari tetuyuba agütsüba jagi timi ketdangsübaren ajembanger. DMC toll Tax saru nija nisungtem nem agütsütsü lemtetbaji nübortem anema inyakba mapa ka lir aser iba inyakyim ajanga public-i timtem jenti ajurutsü, ta ACAUT sangdong nungsa ashi.

Tesüiba mapang ketdangser kati pa den yariteper kar den külemi toll tax saruba mapa contract inyakyim nung agütsüba ACAUT-i meteta lir.

Lease lemzüktsüba maparen nung sen crore aika agütsür nem temelaba agütsü aser talisa parnokji non-local nisungtem liasü. Iba mapang ‘tendering’ maparen timi meinyakba dang masü, saka lease nung inyaktsü maongka angurtemi Income Tax magütsü, ta ACAUT-isa sangdong nung metetdaktsü.

Dimapur nung lease system tanaben tenzükra, Dimapur Municipal telongtet nung gari lenmang, culverts, amala yangluba mapa anenba dang masü saka DMC nung mapa inyaker nisung 300 tema itasen mongui timtemtsü, ta ACAUT-isa khuret bena lemsatep.

Iba lease system ya tashiyim agi sen saruba ama lir. Anungji, September 19 tetuyuba agütsüdaktsütsü atema department tekolakpur nem süpokrem agütsürtemi, timtem mesüra lendong arema iba mapa tenzüktsü akok, ta ACAUT Nagaland-isa metetdaktsü.