ACAUT indang osang tai adok: Neiphiu Rio

Dimapur, August 28 (TYO): Osangkakettem nung NPF (Rio)-i ACAUT aitsür ta adokbaji nübortem dang osang tai sangoktsüba lir, ta NPF tir Neiphiu Rio-i tanü sangdong ka nung metetdaktsü.
“Sorkari ochishia mapa inyaktsü aser nübortem tenzüktsü ta NPF party indang manifesto nung tenangzükba agia aliba nung ni pusema nungiter. Ni ochimashi pusema menungiter mesüra ni ochimashi kümzüka ayutsü atema inyaker masü. Ni Chief Minister aser DAN sorkar dang nübortemi adokba ola angashitsü aser item tebilemtsütem ajanga sorkar tim metemdaktsütsü atema mepishir” ta Rio-isa sangdong nung ashi.
Tesüiba kümtem nung department aika nung nisung talila shimoka lir. Ano, sorkari telemtetba agibatemji public-i nungshiba aser akhangba nunga agia lir. Anungji, asenok ajak külemi iba khuret koktettsü atema tebilemba lemsatepa mapa inyaktsüla, ta paisa shisem.
Nübortem aser sorkar külemi teka amteper khurettem kokteta aotsü indang tangatetba alitsü ta ni imlar. Maneni media danga osang tai meproktsü atema ni mepishir, ta Rio-isa metetdaktsü.