ACAUT Nagaland-i ACVA pusemer

Dimapur, November 10 (TYO) : October 21, 2015 nü NSCN (R) züngsem kari Zonal taxi counter, Kohima nung Wokha-i aoba passenger vehicle (Tata sumo) driver amokmerenba aitsür, ta ACAUT Nagaland sangdong ka nung metetdaktsü.
Abemo ta ser nisung kati anir NSCN(R) züngsemtemi prangpong agi tuiter driver dak züka merenshi. Iba nungji parnok tzürametemi ano parnoki driver ket nungi tashiyim agi sen 5000 meshizüka bener ao, ta ACAUT sangdong nung shia lir.
Iba tatalokba sülen anogo 20 shi süia arur saka tanü tashi tashiyim mapa inyakertem pua marutetba atema süngmanger. Kanga dang tebangkatüskaji, NSCN (R) züngsem jagisa ACVA Tir tepsettsü ta amokmerenba inyakyim lir, ta sangdong nungsa shia lir.
ACVA züngsem ka dak tashiyim inyakba atema tiri ola adok saka meyiper NSCN(R) züngsemi pa tepsettsü ta amokmeren. Iba dak sendakba nung ACVA-i police den FIR ka benokogo aser ibaji kanga tim lir.
ACAUT Nagaland pusema nungitba telok rongnung ACVA ya tongti telok ka lir aser telok ka amai parnoki Naga nunger aser lushi atema tebilemtsü khuret abener. ‘Sorkar ka Saru ka’ ta yimyim ayimba ama telungpur telok ajak ka küma melongjem tashi ACVA-i saru magütsütsü telemtetba agia lir. Anungji ACAUT Nagaland-i Kohima aser Wokha police dang tekaratiba nung Abemo aser par yaritepertem aputsü takhangba agütsür aser ibaji meinyaktetra ACVA-i public ajungtsü mechi nung kechi junger ta bilemdir inyaktsü, ta Media Cell sangdong nungsa metetdaktsü.
ACVA rongdak senden nung NSCN(R) züngsemi sen meyipa magütsüra, par kinünger ket nungi senji meshitsü ta lemtetba bangzüng ACAUT Nagaland-i pusema nungiter, ta sangdong nungsa shia lir.