ACAUT Nagaland-i aitsür; Village Council atema UCC ka alitsü shidanger

Dimapur, Metsüremi (March) 9 (TYO): Alima nung Women’s Day amungba mapang Nagaland kübok yimtsüng ka nung village council kati sobaliba ozüng nung ameter tetsür tain ka züka merenshiba khukhua aitsür, ta ACAUT-i metetdaktsü.
Iba tetsür yagi la nem vote agütsütsü temeten agüja aliba ama mapa inyak saka Village Council (VC)-i yimer candidate shimba nisung nem la indang vote magütsüba atema la merenshi aser iba ya Naga nunger atema maaksü ulura lir. Iba tashiyim mapa inyakertemi meimchir temeten alema inyakogo aser Village Council tenüng tajung tenüng menüktsüogo, ta parnokisa ashi.
Ano, social media nung tebur telok kati yimtsüng ka nung tetsürtem polling station-i marudaktsüi noktangba video ka prokshiogo aser iba ya Election Commission of India (ECI)-i electiong timi aser ochishia agitsü lemtetba anema lir, ta ACAUT Nagaland-ia metetdaktsü.
Election nung village council temi yamai tashiyim mapa inyakba atema kanga sasar aser aoksar. Mokokchung district ajungalen 144Crpc ozüng alitsü agüjaka kodaser tebur telok ka jagi tetsürtem noktangtet ta kanga süngmanger.
Ano, Village Council (VC) züngsem kari yimer candidate ta sangdongba ajanga Village Council tem tenüng menüktsüogo. Village Council-i iba ama mapa inyakba ajanga parnok ya Naga nungertem atema tajangzük masü saka meinprong ka ama ang kümdaktsüogo. Anungji, Nagaland-i alima den liromedema lia onüra, temelenshiji teküpokba jenjang nungi inyaktsüla aser ibaji yimtsüng jenjang nungi adoktsüla ta ACAUT-ibo bilemer. Anungji, Nagaland sorkari Village Council (VC) tem atema uniform civil code inyakyim ka yanglutet nung kanga ajungtsü, ta parnokisa ashi.
Temalen shia aliba onüktem atema Mokokchung Deputy commission Sachin Jaiswal-i mapang shitak nung mapa inyakba atema ACAUT Nagaland-i pa nem tenüngsang agütsür aser district administration o ozüng amertemi aibelenertem ozüng tapet agi merenshitsü aser takoksa ajururtem nem temeten agütsütsü atema mepishir, ta ACAUT-isa metetdaktsü.