ACAUT Nagaland-i ayongzüker

Dimapur, February 9 (TYO) : February 6 aonung Chumoukedima nungi lanurtemi tashiyim agi sen sarur nisung pezü rongnung police ana dena lir, saka aibelener police kar aliba ajanga police department ajunga tenüng memenükdaktsütsüla, ta Media cell, ACAUT Nagaland sangdong ka nung metetdaktsü.
Police department-i aibelener police anaji mapa nungi anentsütsüla aser ozüng tapet kübok aitsütsüla, ta ACAUT Nagaland-isa takhangba agütsüogo.
Rakzükraktemertem rongnung telungpur ana dena lir ta osang angazüker, anungji police-i tenaji telungpur asü masüar osang tejangja sangdongtsüla aser shitak süra, tenaji koba telok nungi’ar metetdaktsütsüla, ta ACAUT-isa metetdaktsü.
Chumoukedima lanurtemi tashiyim agi sen sarur pezü apubaji kanga dang tasü tait mapa ka lir aser parnok nem tenüngsang agütsür. Iba mapa ya yimjung meimba sensosangertemi ajizüktsüla. Maneni, public aser shishilembartem dang telungpur telok shinga nema saru magütsütsü ayongzüker, ta ACAUT-isa mepishia metetdaktsüogo.

You must be logged in to post a comment Login