ACAUT Nagaland-i ‘Clean Election’ sentongtem agi

Dimapur, April 21 (TYO): ACAUT Nagaland-i tesem balala nung “Clean Election” indang lokti sentong aser sensaksem mapangtem agia liasü, ta Media Cell sangdong ka nung metetdaktsü.
ACAUT-i Pfutsero Town aser Phek Town nung lokti senden ana agiba den Chizami town, Chakhesang Baptist Church Council (CBCC), Chakhesang Clean Election Movement aser Chizami Village tem den sensaksem mapang agi.
Maneni parnokisa Chizami Village nung sensaksem mapang agi aser iba nung yimtsüng lennirtem, taintem, GBs, lanurtem, tetsür aser public tem aden.
ACAUT Chairman, Joel Naga-i o jembidang ashiba agi, election merükteta agitsüba ya 2012 küm NBCC-i tenzük saka 2013 election nung ochimashi inyakba teimba liasü aser sen teimba endok.
Youth-net-i bushiba nung Nagaland nung 2013 elections mapang sen crore 900 den teimba endokba osang bushiteta liasü. Anungji ACAUT-ia iba khuret atema tebilemtsü bena, arogo den teka amteper election merüka agitsü atema maparen inyaker, ta Joel Naga-isa ashi.
Naga nungertem memelenshira, 2018 elections ji tamajungtiba asütsü. Naga nungeri teti atema state sorkari dak temulung masüba onüktem mejembitsü aser NBCC-ia Naga nüjiso maparen inyakba ama clean election campaign ya teti atema inyaka maotsü. Naga lanurtemi 2018 tashi nung temelenshi ka adokdaktsütsüla aser ibaji election merüka agitsüba lir, ta paisa ayongzük.
Public Mobilization, ACAUT Convenor, Tia Longchar-ia o jembidang, Pfutsero aser Phek Town renlokba atema tenüngsang agütsü.
“Nagaland nung ‘backdoor appointment’ inyakyim ajanga kin o kin tsüngda meputep adokdaktsür, kechiyong minister temi nübo tajungtiba asaa masü saka ozüng alema pei kin nungi nisungtem ang mapa nung shimoker,” ta Tia Longchar-isa ashi.
“Tanü asen Naga nunger tensa reprangdangra, asenoki asen vote sen yong ayoker aser iba jagi asen chirnurtem tarutsü tia tamajung lir. Anungji, Naga nunger tsüraburtemi pei tanurtem school aser university tem nung züngdaktsütsü nüngdak madoker” ta ACAUT Consultative body member, Khekiye K. Sema, IAS Retd.-i o jembidang ashi.
Public-i pei indang vote yoka achiba sülen gari lenmang, mozüki, school tajungtem kua ta akhangtsü temeten mali, ta paisa ashi.
“Election mapang asen candidate tem Lucifer tedi tambusang ama akümer. Asen state nung tanur dang sayutsü asoshi temsüa maliba ‘proxy’ tesayurtem aika lir aser iba ya ajanga kaket shisatsü bushibaren nung tanur aika tia raksatsüogo,” ta Khekiye K. Sema-isa metetdaktsü.
Chizami Village nung sensaksemdang nisungtemi ACAUT züngsemtem dang tasüngdangba aika asüngdang aser onüktem rongnung, ochimashi, ‘Sorkar Ka Saru Ka’ aser 2018 general election nung ACAUT-i tokteptsüba indang dena liasü.
ACAUT Nagaland züngsemtemi, ACAUT ya ochimashi aser saru aika saruba nokdangtsü atema maparen inyakba mita reprangba telok ka dang lir aser yimtenren telok ka akümtsü atema tebilemba kecha mali, ta telangzüba agütsü.
Pfutsero nung Public rally ji CBCC den ACAUT Pfutsero unit ajanga ayongzük aser iba sentong nung mendenji Wezote Kreo (Convenor, ACAUT Pfutsero Unit) liasü aser PTBC Senior Pastor, Rev. Dr.N. Chiero-i temoatsü meshia sarasadem.
Sentong nungsa CBCC Executive Secretary, Rev.Dr.Vezopa Tetseo-i tajungshi o jembi, Chakesang Clean Election Movement Convenor, Dr.Kuzhopoyo Tunyi-ia o tatsüka jembi aser RBC Pastor, Zunie Veyie-i tenüngsang agüja sarasadem.
Phek Town nung agiba Public rally ji Phek Town Youth Society, Phek Chamber of Commerce & Industries, Phek Town Students Union aser ACAUT unit Phek temi yaritepa ayongzük.
Sentong nung mendenji ACAUT Unit Phek Convenor, Neizote Venuh liasü aser Nusakho Chero-i temoatsü meshia sarasadem.
Phek Town Youth Society President-i tesentepertem pela agizüka o jembidang, ACAUT teloki Phek semdangba atema pelaba ashi aser paisa Khekiye K. Sema ama Naga nunger ama ochishir shinga mali ta shisem.