ACAUT Nagaland-i hopta ka tsüngda bushisüngdangtsü akhanger

Dimapur, June 29 (TYO) : June 27, 2016 nü ACAUT den police aser district administration-i Dimapur aser Chumukedima nung ozüng alema totzü meyoktepa ayokba mapa mita aoba sülen bushisüngdang mapa nung tetsükdaktsü aika ajurutsü, ta ACAUT Nagaland-i Commissioner of police, Dimapur dang shidi ka ajanga metetdaktsü.
Sorkar nung temaba ketdangsertemi police/district administration nem tetuyuba balala agütsütsü akok, saka nenoki itemji kokteta bushisüngdang mapa timi inyaktsü ta onoki amanger. Sensotem mulung süngzükdaktsütsü atema bangdakpurtemi tsünglanglen agüja aliba onüktem inyakdaktsünür, ta ACAUT shidi nungsa shia lir.
Ozüng alema inyakba mapa mita aoba sülen hopta ka tsüngda ozüng alema totzü meyoktepba mapa ketdangsüa inyakertem ajak aputsü atema akhanger. Parnokji Dinanath, Srikanth, Umesh, Navel, Romeo, Ajay aser Lalmohan ta jangjaogo aser ano tangartema alitsü. Ketdangsertemi bushisüngdang metembang tashi parnok ajak indang kiojen aser rongsentem sota ayutsüla, kechiyong parnoki ozüng alema itemji bena aruba ama ajiteter. Ken o tembanga bushiba sülen aibelenertem indang kiojen aser rongsentemji auction asütsüla, ta ACAUT Nagaland Co-Chairman, Dr. Khekugha Muru aser Member, K. Tiatemsu nati shidi nung shia lir.
Ozüng alema totzü meyoktepba mapa ya inter-state inyaksangshi ka lir, yimsüsürtem dena tongti ketdangsertema dena alitsü akok. Ajisüaka, bushisüngdanertemi tetsübu mesüra tarendakba kecha melii bushisüngdangtsüla aser shilem agir tenüng ajak yimjak nung metetdaktsütsüla. Tai tonglokja alir karbo Dimapur nung dang masü saka district balala nung fuel station tem lapoka lir ta angazüker. Anungji item fuel station temji yimjak nung metetdaktsütsüla, shibangtsütsüla aser public tsüngda auction asütsüla ta ACAUT-i akhanger, ta Commissioner of police, Dimapur dangi züluba shidi nung shia lir.
Ozüng alema totzü meyoktepdak ali kiburtema iba mapa nung shilem agia alitsü akok ta temulung melemi bilemer. Anungji, parnok ozüng tapet kübok bushisüngdang asütsüla aser district administration-i parnok indang kimung sota ayutsüla. Bushisüngdangba nung parnoki aibelenba putetra ali kiburtem indang kimungji auction asütsüla. Ano, iba inyakyim nung Food & Civil Supplies Department-ia shilem agia alitsü ta temulung malemer, kechiyong tesem ajak nung SK Oil aika angu. Iba ya ajanga ozüng alema SK Oil belenba inyakyim ajiteter anungji iba dak sendakba ken o kanga junga bushisüngdangtsüla aser hopta ka tsüngda bushitetba osang yimjak nung metetdaktsütsüla, ta ACAUT-isa takhangba agütsüogo.
Ozüng alema totzü meyoktepba tesem 6 mita aodang, tanker 19 shia nung SK Oil (Blue colour) litre 12,000 shi enoka aliba apu. Item tanker nung anguba SK totzüji tajemba agia litre 228,000 shi asütsü. Ano, containers, plastic tanks, iron containers, drums, nung SK totzü litre 150,000 shi bendena aliba angu. SK totzü indang jenjangji open market nung litre nung sen 50 agi odangra, sen crore 2 jungnüa adoker, ta ACAUT-isa ashi.
June 27, 2016 nü apuba SK totzüji district ajak nung beneficiaries nem agütsütsü akhanger aser fuel tankers 19 dena apuba oset ajakji auction asütsüla.
Ozüng alema totzü meyoktepba mapa nung SK Oil den (Asian Paint brand) aser industrial paints (Zero solvent) nunger amshiba putetogo aser ibaji kanga dang taoksatsüka lir. ACAUT-i West PS aser Diphupar PS nung FIR tem benokogo, anungji teimla makai aliba sensotem dang ozüngji tematiba ta sayutsü atema nenoki tetsükdaktsü aser meinprong ajuruaka bushisüngdang mapa takok ngua inyaktsü ayongzüker, ta ACAUT Nagaland-i Commissioner of police, Dimapur dang shidi nung metetdaktsü.