ACAUT Nagaland-i ICICI Bank aser KVIC aitsür

Dimapur, April 12 (TYO): Naga nunger entrepreneur ka PMEGP loan (Prime Minister’s Employment Generation Programme) atema shima sen lakh 22 lemzüktsü saka ICICI Bank-i kuli tejangja kecha melii loan magütsütsü ta shia temeten noktangba inyakyim kukua aitsür, ta ACAUT Nagaland-i metetdaktsü.
Tesüiba küm 7 tashi ICICI bank-i local entrepreneur shinga nema loan magütsüi aruaka KVIC (Khadi and Village Industry Commission)-i loan agütsürtem rongnung ICICI Bank züngsembaji kanga dang tamashi mapa ka lir aser iba inyakyim aitsür, ta Media cell, ACAUT Nagaland sangdong ka nung metetdaktsü.
ICICI Bank-i entrepreneur tem anema noktaker saka KVIC-i iba bank züngsemba nung taitsü keta lir, ta sangdong nungsa shia lir.
Naga nunger entrepreneur jagi KVIC dang ICICI bank ketdangsertemi tim mesüi inyakba osang sangoktsü aser tanga bank ka ang tuyutsü atema asüngdang saka KVIC-i ibaji magizük. Ita asem tashi pa timtemdaktsüba sülen ICICI Bank-i sen lakh 22 nungi sen lakh 1 loan agütsütsü ta pa dang ashi. Iba ken o atema ACAUT Nagaland-i tiyongtsü nung ia mapa inyakba sülen ang entrepreneur nem sen lakh 10 loan agütsü, ta ACAUT Nagaland-i sangdong nung metetdaktsü.
Kanga dang taoksatsükaji, ICICI bank-i banking inyakyim anema mapa inyaker aser iba bank ajanga customer nem Cash Credit (CC) facility magütsür.  Ibaji ajanga ACAUT-i iba bank ya deposits atema dang lapokba ama temulung melemi bilemer, ta Media Cell, ACAUT Nagaland sangdong nungsa shia lir.
Nagaland nung entrepreneur tem bank ajanga timtem agütsüba ken o meyirjang aika rongnungi iba ya ka dang lir. Anungji social sector atema mapa shitak meinyakba bank tem Nagaland state sorkari state nungi meindoktsüla, ta ACAUT Nagaland-isa metetdaktsü.
Nagaland nung nija bank temi local nisungtem anema ibala mesükba mapa inyakba ACAUT-i maremzüktsü. PMEGP nung shima aliba nübotem kar bank-i timtem agütsüba lira ACAUT ketdangsertem den tongteprateptsü mepishir, ta parnokia shisem.