ACAUT Nagaland-i lenir Hokivi Chishi asüba mangyimer

Dimapur, August 05 (TYO): ACAUT Nagaland Media Cell-i sangdong ka ajanga, “ACAUT Nagaland züngsemtemi kanga moa-a asür Hokivi Chishi den külemi inyaksemogo; pa ya nisung tajung ka, temeim aketba nisung ka aser tasütait lenir ka liasü, aser ibaji ajanga tarutsü nunga maneni onok ajungmesotsü,” ta metetdaktsü.
“DCCI Tir aser ACAUT tenteter züngsem, asür Hokivi Chishi-i nüburtem aser shishilembartem saru khuret agi timtemba sangdongtsü atema tasüita inyaktsü tenzük, ibaji ajanga aika atalokogo aser saru inyakyim, syndicate inyakyim aser market monopoly junga amenteter aliba tamendakdak anokshitsüsa aküm, aser ibaji ajanga tzüzüng-ozüng maliba, ochimashi aser kinünger nem maongka agüja inyakba anema Nagaland putiotsü nung nüburtem asentenshiba tulutiba rongnung ka aküm,” ta ACAUT-isa metetdaktsü.
“Külem tenzüker ka aser lenir ka alima nungi pilaba atema mangyimbaji o agi jembitsü makok, ajisüaka ACAUT kibongi mangyimer kibong den mangyim jashi lemsateper. Tsüngremi asür kibong nem tashi agüjang aser tesünep agüjang ta onoki sarasademtsür. Temeim aketba nisung ya onoki teti menungratsü,” ta sangdong nungsa shia lir.
ACAUT Nagaland-isa, medemer, tajangzük agütsür aser lenir nem akhüm agütsütsü arur ajak dang pelaba metetdaktsür, ta sangdong nungsa shia lir.