ACAUT Nagaland-i lokti sentong tuluka ayongzüker

Dimapur, August 18 (TYO): ACAUT Nagaland-i August 25, 2017 nikongdang 3:00 ako nungi Dimapur, Super Market Area nung public rally ka alitsü ayongzüker.
Nagaland nung tesayurtem, kaketshirtem aser public dena ajaki ochimashi aser sorkar ketdangsübaren nung temulung mesüi ola adokba angashia ACAUT-i iba sentong alitsü mulungteter.
Ochimashi ajanga asenok ajak nem maaksü bener arutsüogo aser tang ama kodamasüba mapang nung ola madoki alirtemia ola adoktsüla. Nagaland nung tang nisung teimbai ochimashi magizüker saka olabo madoker, ajisüaka tang asenoki asen mangatetteptem toktsütsüla aser Naga nunger ajak ajungtsü bilema longjemer ochimashi anema ola adoka nokdaktsüla, ta Media Cell sangdong nung metetdaktsü.
Naga nunger kin, kidong, telok, tamangba yimsü telemsa ajaki iba sentong nung adentsü ayongzüker. Asenoki joko ojang ta ayimoktsüdi aser ochimashi medeni loktiliba nung liyonga otettsü lenmang lir ta shidi, ta ACAUT-i sangdong nung shia lir.
Nisungtemi pei kidang nungi ochimashi anema mejembii mapa agi sayutsü asüngdanger. Talisa social media bloggers lakh aika alibatemi, iba sentong nung arua adentsü aser gari lenmang majungba aser ochimashi mapa anema ola adoka jembitsü ayongzüker, ta ACAUT-isa sangdong nung metetdaktsü.
India nunger aser India nung Khristantemi Naga nungerji sen yong yoka achirtem ama züngshir aser asenoki sen ang külemer ama jembir. Iba tangatetba ya anendaktsütsü aser asen tenüng tajung meyipa bener arutsüla. Ibaji asangsang nung ataloktsü atema kin teloktem aser mulungtet teloktemi ACAUT den yaritepa iba rally pusemtsü mepishir.
ACAUT-i tribal Hohos, lanur teloktem, kaketshir tentettem aser Nagaland kübok district ajak nungi Chamber of Commerce temi pei pei züngsemtem iba sentong nung adentsü atema yoktsü mepishir. Talisa Nagaland nung aliba Arogotemi iba sentong takok ngua agitettsü atema sarasademtsütsü mepishir, Media Cell sangdong nungsa metetdaktsü.
Meta talang pilar aliba district mesüra yimtsüng nungia tashitsü kar lira aser ochimashi ajanga timtem ajuruba osang lemsatepnüa lira, nenoki phone number- 7005070868 ajanga osang metetdaktsütsü akok, ta Media Cell-isa ashi.