ACAUT Nagaland-i NPF P&IC dang langzür

Dimapur, August 28 (TYO): ACAUT Nagaland-i Shurhozolie’er telok pusemer ta NPF Press & Information Cell (T.R/Rio)-i tai tongloktsüba medentsüsa kuli kecha mali aser tamagitsü lir, ta tanü Media Cell sangdong ka nung metetdaktsü.
Dr. Shurhozelie-i Chief Minister inyakdang ACAUT Nagaland-i pa dang pai backdoor appointment ajungmesoa züluba shidi ka atema pa nem tasüngdangba agütsüogo, ta sangdong nungsa shia lir.
ACAUT Nagaland-i tesüiba küm 10-15 tsüngda backdoor appointment, MNREGA, PDS Scams, totzü meyoktepba, lenmang aser aputem majungba, terenlok mapa inyaktsü atema sen crore aika tim mesüi amshiba amala ochimashi onüktem atema ola adokba nung ajak densema lir, anungji Chief Minister T.R. Zeliang dak dang tenük yoka inyaker ta onok aitsüba nung medentsüsa kuli kecha mali aser nübortemi ibaji mamanger, ta Media Cell-isa metetdaktsü.
August 25 nü “All Nagaland Public Rally” nung adener nisung 65,000 dak temai tesüiba küm ishika sorkar ketdangsübaren nung tim mesüi aruba anema ola adokba aser bangzüng renemogo. Anungji, Angh-i nübortem atema inyaker süra, nübortem tejashi aser taginüba angateta mapa inyaktsüla,
Anungji, NPF P&IC (T.R/Rio)-i ACAUT Nagaland dak tai metongloktsüi OSD, FD den ajurutepa pai T.R. Zeliang indang tenüng tetshi asü metetshiar metettsü merangang. ACAUT-ibo OSD, FD-i kechi ashi, iba nungji ajemdaker dang osang lemsatepogo, ta Media Cell-isa metetdaktsü.