ACAUT Nagaland-i NSCN (IM) dang pelar

Dimapur, April 23 (TYO): NSCN (IM)-i public indang timtem angatetba aser tebilemtsü abenba atema ACAUT Nagaland-i pela agizüker, ta Media Cell sangdong ka nung metetdaktsü.
Naga nunger sarusaji onsara aliba ajanga timtem jenti ajurur aser iba atema NSCN (IM) nung Collective Leadership-i nübortem khuret angateta saru saruba yimya melenshitsü lemtetbaji kanga dang shisa ka inyakba mapa ka lir. Iba ya tebilemtsü bena agiba telemtetba ka lir aser tim lenmang nung mera ka agiba lir, ta ACAUT-i ashi.
Linük yangerba maparen nung nübortem olaji ajak madak tulutiba lir aser NSCN (IM)-i iba ola angashibaji kanga shitak, ta sangdong nungsa metetdaktsü.
Maneni, ‘Syndicate’ system agienbaji kanga dang nüngdaka aliba temelenshi ka lir. Iba ajanga state ajungalen taxation system nung kongshitsü aser Naga nungeri aginüba Sorkar Ka Saru Ka asangsang nung ataloktsü.
ACAUT Nagaland-i Naga Yimten Telok ajak dang Naga nunger pungmang asangsang nung ataloktsü atema inyaktsü mepishia metetdaktsür, ta Media Cell sangdong nungsa ashi.