ACAUT Nagaland-i pelaba metetdaktsür

Dimapur, December 18 (TYO) : Kin mesüra sentsü telemsa kecha melii December 13-14, 2016 anogotem signature campaign agidang aser ano December 15 nü public rally nung telok balala aser nübortemi pusema nungitba sayua aser süoki ia bilema shilem tajung agiba atema ACAUT Nagaland-i kanga pelar aser onok tali ajemalushir, ta Media Cell sangdong ka nung metetdaktsü.
Police-i tzü kahloktsüdang, tenük amdaktsüba mokozü amshidang aser süng agi azükdang, tetsütem aser tetsürtemi kanga dang tasü itta teburtem meketbanger kümzükba angudang kanga süngmang aser tzüratema reprang, ta ACAUT Nagaland-i metetdaktsü.
Tetsürtemi iba ama tasütait mapa inyakba angudang, tetsütem aikati ACAUT asoshi sarasademtsüdar ta asüba kuli sayur aser iba ajanga onoki ochimashi anema tali temerangba nung raratsü lemteta aliba tali akangshidaktsür, ta parnokisa ashi.
ACAUT Nagaland-isa Lotha Hoho Dimapur, NTC Dimapur Urban Council Chairman’s Federation (DUCCF) aser kija kari R.Z Lotha den tongtepratepa jembishinüba atema parnok dang pelaba metetdaktsür, ta Media Cell sangdong nungsa shia lir.