ACAUT Nagaland-i PHQ nungi telangzüba meshir

Dimapur, January 27 (TYO) : Nagaland nung industry ka dang lir aser ibaji tashiyim agi sen saruba industry lir ta angateta aser ano ACAUT-i state sorkar nem tezüluba nung temepishiba aiben agütsüba ajiteta India sorkari Ministry of Home Affairs (MHA) ajanga Nagaland kübok district ajak nung “Anti-Extortion Cells” aser “Quick Response Teams” tentettsü tetuyuba agütsüogo.
ACAUT-i aiben State sorkar dang temepishiba agütsüogo saka sorkari süoki ia magizüki mapang shitak nung teinyaktsü meinyakba ajanga MHA-i State sorkar nem tetuyuba agütsüsa aküm, ta Media Cell, ACAUT Nagaland-i sangdong ka nung metetdaktsü.
September 14, 2015 nü DGP, Nagaland-i district ajak nung SPs/Commissioner tem dang tekaratiba nung AECs aser QRTs tentettsü atema tetuyuba agütsü. Ajisüaka tanü tashi district police temi AEC aser QRT tentetba osang yimjak nung memetetdaktsü lir, ta ACAUT sangdong nungsa shia lir.
Tashiyim agi sen saruba inyakyim azüoktsü aser noktangtsü atema district ajak nung AEC aser QRT tentettsü DGP-i tetuyuba agütsü, anungji PHQ-i iba asoshi telangzüba agütsütsüla. Tenteta lira, kechiba public nem memetetdaktsüi miimbanga ayur ta asüba kuli dena parnoki agütsütsüla, ta ACAUT-isa metetdaktsü.
PHQ-i iba osang magütsütetra parnok inyaksangshi madak tashi kar ajanga mapa meinyaktsü sota ayur ta ACAUT Nagaland-i bilemtsüsa akümtsü, ta sangdong nungsa shia lir.