ACAUT Nagaland-i Sept 12 nü arok sabang ka ayonger

 

Dimapur, September 04 (TYO): ACAUT Nagaland-i ayongzüka September 14 nü DDSC stadium, Dimapur nung nikongdang 3:00 ako nungi tenzüka “Nagas’ opinion on peaceful settlement” omen nung ajemdaker sabang ka nungi Naga nunger tashi-tawar aser Arogo nung lenirtemi jembitsü, ta ACAUT Nagaland-i sangdong ka ajanga metetdaktsü.

Arok sabang ayongzükba okila ji- “Naga nunger asoshi ano maongka ka asütsüsa, puti otsü ajanga ano tarutsü tia atema asenok lenmang tasen ka nung noktakdaktsüogo aser iba asoshiji asenok nisung shiai asen tajungtiba agi noktaktsüla, koba dang asenok ajak senteper shisatetba ta ajar. Naga yimten tebilemtsü ya tajungtiba nung latettsü asoshi tesüiba mapang aibelentem melepshitsüla aser iba maongka ya magii mesüidaktsütsüla. Tanü asenok telemtetba agibatem ajanga tarutsü putu nung yimjung aser azükaru alitsü asoshiji shilem agir ajungai tezüngzüktep ajakji jungjunga angatettsü nüngdak. Iba sülen Naga nungertemi mulungba ama agizüktsüla. Iba ama ajak dendaktsübaji ajanga yongyaa aliba ama One Naga National Government ataloktsü.” ta ACAUT Nagaland sangdong nungsa shia lir.

Anungji arok sabang nungi tebilembatem lemsatepba ajanga latettsü aliba Naga Accord ji tashi itdaktsütsüla. Iba sentong tongtibangtibaji lenirtem aser nüburtem tsüngda shisalemsatepba sentong asütsü aser print aser electronic media naprong adentsü, ta parnokisa shisem.

Iba sentong nung tentettem, Naga tribal Hoho ajak, kaketshir tentet tulu ajak, tetsürtem tentet tulu ajak, Dimapur nung aliba tribal tentet ajak, denomination balala nungi Arogotem aser Arogo dak sentakba tentettem, jenjang ajak nungi GB/DB tentettem aser kaket rejutem densema ajak arua adentsü mepishir, ta ACAUT Nagaland-isa metetdaktsüogo.

ACAUT-isa Nagaland nung aliba Arogotem ajaki tan Deobar (September 6) nü pei pei arogotem nung September 12 nü sentong asoshi sarasademdaktsüner, ta mepishiogo.

Dimapur nung aliba Arogo balala nungi Pastor tem danga pei arogopurtem dang iba sentong indang osang metetdaktsütsü aser iba sentong nung adentsü ajungshidaktsüner,  ta ACAUT-isa mepishia ashi.

Iba den külemi Dimapur district yimtsüng aser kiyong ajak nungi lenirtema medema arua dendaktsüner, ta ACAUT-isa metetdaktsü.