ACAUT Nagaland-i ‘Solution before Election’ nung külemi noktak

Dimapur, Tsüklai 9 (TYO): ACAUT züngsem kari Tsüklai 9, 2018 nü sangdong ka agütsüba atema sasa bilemtsür aser iba osangji shitak masü kechiyong ACAUT-i tashishitsü melii dang ‘Solution before Election’ atema külemi pusema nungit, ta ACAUT Nagaland sangdong ka nung ashi.
CCNTHCO nung ACAUT-i shilem agibaji ajaki mulunga agiba liasü, anungji ACAUT züngsemtemi parnok kija tangatetba nung shilem agi ta asübaji tai lir. ACAUT züngsem kari Arogo, NJCF, tongti kin hohotem, teloktem, civil society aser olemtep nung adenba teloktem tsüngdang nangzükba meyipa agibaji tim masü aser Naga nunger anema lir, ta Convener Public Liaison Simon Kelio aser Co-Chairman Tia Longchar nati sangdong ka nung ashi.
ACAUT lennir kari osangbener senden ka jazüka parnoki election magitsü atema inyakba mapa nung shilem magi aser iba atema lennir ana dak tai tongloktsüba atema osang tejangja metetdaktsüla. Talisa lennir anati menden yutsüba sülen ang kechiba parnoki iba onük jembir? ta tenatisa asüngdang.
Luchii 9, 2018 nü NNPGs indang Working Committee-i senden ka jazüba nung tongti kin hohotem aser ACAUT Nagaland dena civil society telok ajak adentsü jaok. Iba nung ACAUT tenüng nung Chairman Joel Naga, Dr. Khegukha Muru aser Mar Longkumer nungertem aden aser par asempronglai ACAUT züngsemtem ta sign asü.
Iba senden nung adenertemi India sorkar dang 13 buba Nagaland Legislative Assembly indang election thinena atatsü atema mepishitsü bangzünga renem aser iba osangji media ajanga prokshia liasü. Iba bangzüng nung ajemdaker ACAUT Nagaland-i Aenjeti 3, 2018 nü ACAUT office nung senden ka amen aser idangji ACAUT Nagaland-ia Luchii 9 nü lemtetba ama India sorkar dang election thinena atang ta shidi ka zülutsü lemtet.
Aenjeti 6, 2018 nü ACAUT-i PM Modi dang election thinena atatsü aser Nagaland nung President’s Rule benoktsü atema shidi ka zülu aser Aenjeti 19 nü Lotha Hoho Ki, Dimapur nung NTC-i election magitsü onük atema senden ka ayongba nung CNTC, Nagaland GB Federation aser ACAUT aden.
Iba senden nung ACAUT tenüng nung Chairman Joel Naga, Co-chairman ana- Dr. Khekugha Muru aser Tia Longchar den züngsem asem aden. Senden nungsa Aenjeti 22, 2018 nü NJCF (Nagaland Joint Christian Forum)-i ayongba senden nung adentsü bangzüng ka renem.
NJCF senden nung telok ajak adenba Committee ka tentettsü lemtet aser Aenjeti 25 nü Hotel Japfu, Kohima nung senden ka amentsü jazük. Iba senden nung CCNTHCO tenzüka liasü,
Item ajak yagi ACAUT-i election masü Naga yimten latettsü tangatetba nung külemi noktak ta kuli sayur. Ajisüaka, züngsem kari ACAUT indang office nung masü saka tanga tesem ka nung rongdak senden ka ayonga amenba aser tiyazü nung ACAUT züngsem kar tenüng menüktsüba aser tashishitsü aketba telemtetbatem agibaji “All for one, one for all” tangatetba anema inyakba mapa ka lir.
Tsüklai 9, 2018 nü sangdong agütsüba jangjashitsü atema Tsüklai 14, 2018 nikongdang 1:00 ako nung ACAUT indang office nung ACAUT lokti senden ka amentsü jazüker. Anungji züngsem ajak iba senden nung arua adentsü mepishir. Iba lokti senden nung ajaki agizüktsüsa telemtetbatem magi tashi ACAUT züngsem shingaia sangdong kecha magütsütsü mepishir aser ACAUT lennir anati menden toktsüba shiditemji lokti senden nung benokba sülen ang telemtetba agitsü, ta ACAUT lennirtemisa ashi.