ACAUT Nagaland-i telangzüba meshir

Dimapur, September 19 (TYO): Osettsüset kar nung sorkar department balalai saru agiba dak sendakba nung ACAUT Nagaland-i sorkar departments dang nungi telangzüba aginer, ta tanü Media Cell, ACAUT-i sangdong ka ajanga metetdaktsü.
Nagaland GST Act, 2017 benokba sülen iba Act kübok Arrla 173 ajanga, Municipality sarutem malitsü aser tanga sarutem tanga nung bendenloktsü, ta shia lir.
“Municipality saru atema ozüng kar alitsüa akok, ajisüaka GST Bill den e-way bill liaka cement bag shia nung saru sen 2.50 agibaji tashishitsü lir. Koba emelaba aser sangdong nung ajemdaker iba kisüba oset nung saru meshir, ibaji telangzübaji ACAUT-i DMC dang nungi aginer,” ta ACAUT sangdong nung shia lir.
“Royalty tax indang sensotem tangatetbaji pei state nungi adokdaktsübatem atema asütsüla. Tanga state tem nungi adokba minerals nung Forest Department den Geology & Mining Department-i royalty taxes agiba ajanga saru anasü kümdaktsüba dang masü saka ‘royalty tax’ chichiba le gal tetezü makai kümdaktsür, kechiyong iaji state ana tsüngda magir. Anungji ACAUT-i tim ketdangser nungi telangzüba aginer aser ibaji tekaratiba nung metongshidaktsüner. GST billing nungji saru tajangzük nungi Nagaland State sorkar shilem-a lir,” ta ACAUT-isa metetdaktsü.
Nüburtemi renemba bangzüng “sorkar ka saru ka sorkar” ataloktsü atema ACAUT-i akokba tashi Naga Council indang PAC nungita yaritsü, ta kasa sangdong nung shia lir.