ACAUT Nagaland-i Treasury Dept aser DDPA dang asüngdanger

Dimapur, Metsüremi (March) 21 (TYO): Pensioner tem dang nungi sen 2000 tim mesüi sarur ta osang ka angazükba atema ACAUT Nagaland-i Dimapur nung District Treasury office anaben tashi semdanga osangtsüsang metetpelaa liasü.
Iba ashishitep aketba onük atema kuli tejangja metettsü atema ACAUT-i mezüng Dimapur District Pensioners Association (DDPA) den ajurutep aser idangji DDPA ya pensioner tem yaritsü atema voluntary tentet ka dang lir aser temulungertem dang adentsü akok ta ketdangpurtemi ashi, ta ACAUT Nagaland sangdong ka nung metetdaktsü.
DDPA-i revised ROP reprangshimtsü atema financial consultant ka hire asü aser iba atema pensioner temi sen 2000 ji voluntary tangatetba nung dang agütsü ta ashi.
Ajisüaka, DDPA-i ashiba nung temulung masüba agi ACAUT ketdangpurtemi Senior Treasury Officer (STO) den ajurutep aser idangji treasury department-i sorkar tetuyuba mesüra finance department indang office memorandum kecha mangu saka Metsüremi (March) 14 nü parnok Kohima-i abeni atu ta ashi.
Pension reprangshimtsü aser agütsütsübaji treasury department indang mapa lir aser department mesüra sorkari DDPA nem form tem alemtsü temelaba magütsü. Office nung mesüi tangalen financial assessment asüba aser non-governmental body kati agütsübaji department-i magizüktsü aser DDPA-i sen 2000 sarubaji ozüngi memelar, ta STO-isa ACAUT dang ashi.
ACAUT-i tajurutsüpurtem den ajurutepba sülen tasüngdangba kar metetnüa asüngdangogo aser itemji, “Department of Treasury-i DDPA nem form tem alemtsü temelaba magütsü süra kechiba DDPA-i form alemer.? Treasury department-i dang ROP reprangshimer aser pension agütsür anungji kechiba treasury department-i parnoki meteta NGO ka nem iba mapa inyakdaktsür?” ta asübatem lir.
Dimapur district nung pensioner 20,000 shi ka lir ta süra aser parnok 5000-i sen 2000 ji DDPA nem agütsür ali nungbo sen crore ka shi saruteter asütsü, süra DDPA-i iba sen jagi kechi inyaktsü aser kechiba sen paikaji nüngdaker? ta ACAUT-isa asüngdang.
Treasury department-ibo form tem angati dang agütsür saka kechiba DDPA-ibo form ka nung sen 10 agi ayoker. Kechiba tanga district tem nungbo mesarur saka Dimapur district nung dang balaka sarur? ta parnokisa asüngdangogo.
Pensioner tem dang nungi sen 2000 sarubaji ashikülak mapa ka dang lir ta ACAUT Nagaland-ibo bilemer aser asenoki iba onük ya jungjunga bushidangra bogus beneficiary aika putettsü südi ta bilemer, ta ACAUT ketdangpurtemisa ashi.
“DDPA-i pensioner dang nungi 2000 saruba meyipa agütsütsü aser iba nung sen 10 agi form ayokba senjia meyipa agütsütsü atema ACAUT Nagaland-i takhangba agütsür. ACAUT-isa Finance Commissioner dang iba financial year tembang tashi nung ROP agütsütsü aser tang adoka aliba ken o ya reprangshimtsü mepishir,” ta ketdangpurtemisa metetdaktsü.