ACAUT Nagaland-i yimtenren onük nung shilem magir

Dimapur, August 22 (TYO) : Yimten teloktemi ochimashi ken o tuteta jembiba nung ACAUT Nagaland-i tebang mei dang arur. 2014 küm Congress-i Horticulture Department/Axis Bank ken o temai adoka jembiba mapang ACAUT-i Congress den meyaritep kechiyong iba onük nung yimtenren mapa densema liasü, ta Media Cell, ACAUT Nagaland sangdong ka metetdaktsü.
Home Department nung backdoor appointment aser ‘Pick and Choose’ inyakyim indang onük mejembiba atema tawa tu nisung kari ACAUT aitsüogo. Tajemdakdak kecha melii ACAUT aitsüaka, Home Department nung ‘backdoor appointment’ indang onükji mezüng July 29, 2015 nü Congress teloki yimjak nung metetdaktsü. Anungji ACAUT Nagaland-i yimtenren dak sendakba nung shilem magiba tangatetba nung ajemdaker iba onük atema sangdong kecha magütsür, ta Media Cell sangdong nungsa shia lir.
Iba onük atema Youth Congress-i September 1 nungi lungkak aittsü ta amokmerena metetdakja lir aser iba yimten onük nung ACAUT-i shilem magitsü.
Ano külen, Chakhesang Students’ Union-ia August 12 nü iba kasa onük yimjak nung metetdaktsüogo aser iba mapa tajung atema parnok nem tenüngsang agütsür.
‘Backdoor appointments’ mesüra ochimashi mapatem yimjak nung tuteta metetdaktsüba mapaji anogo ka nung dang inyaktetba mapa mesüra iba mapaji ACAUT-i dang inyaktsüla ta tai pua anidakertemi metettsüla, ta Media Cell-isa ashi.
Nagaland nung sorkar department 84 lir aser ano tanga onük aika lir, anungji ochimashi anema raraba mapa nung mulungtet telok ajak, kin balala nungi teloktem aser kaketshir tentettemi shilem agitsüla. ACAUT-i maneni department ajak nung ‘backdoor appointments’ inyakyim putettsü atema merangtsü saka teyariteper melira iba mapa ya meilungi ang inyaktettsü.
Ano külen, NSCN (R)-i Naga yimten tebilemtsü atema o tululu jembitsü tenzük saka parnoki Dimapur nung saru saruba mapa tenzükba sayua Amit Jain taküm agitsü merang. Tia kaa iba tatalokba nung Amit taküm kümzükogo.
Iba mapa ya Naga yimten telok ajaki inyaker. Pei aliba metetdaktsütsü atema nisung dak injang agi akhatsü mesüra yirutsütsü aser ibaji ajanga tanüngba shishilembartem temulung iladaktsür aser iba sülen tetsükdaktsü kecha melii parnoki saru meshir, ta ACAUT-isa metetdaktsü.
Naga yimten teloktem nungi lennirtemi Naga yimten tebilemtsü atema onük tululu jembir saka parnok kübok aliba züngsemtemi tashiyim agi sen saruba, nisung yirutsüba aser tepsetba mapa inyaker, ta parnokisa shisem.