ACAUT Nagaland sentong nung nisung meyirjang aika aden: Rally nung adenertemi onük 7 bangzünga renem

(Abelen) Khekiye K Sema, IAS (Retd)-i o jembidang agiba noksa angur. Achiji nung ACAUT rally nung adener kar angur. 

Dimapur, August 25 (TYO): Anü tatsük arema Hokolbar nikongdang nisung meyirjang aika Against Corruption and Unabated Taxation (ACAUT) Nagaland-i Super Market area, Dimapur nung ayongzükba sentong nung arua aden.
Iba rally ya “War against corruption, the battle to reclaim Nagaland” omen nung ajemdaker agi.
Sentong nung o jembidang Khekiye K Sema, IAS (Retd)-i “nenok lanuputu lir aser asüngji nenok atema lir, saka tanü nenoki ochimashi mesamatsüra, nenoki asüng tajung ka mangutsü. Anungji lanuputui iba rara nung shilem agiang aser onok taintemi nenok pusema nungittsü” ta ayongzük.
“Dimapur nung ajaki akhümtsübuba telok- Naga Council Dimapur (NCD)-i iba rally nung parnok züngsemtem madentsü tuyubaji Naga nunger ajak atema maaksü ka lir. Nübortem asoshi nokdakertemi NCD len anitsüla,” ta Khekiye-isa ashi.
Tanü Naga nunger aakmesen mali kümogo, asenoki asen maitsü non-local tem dang ayoker aser parnok nem asenok tenüng nung shishilembadaktsür. Tsümartemi tajangzük aika angur aser iba jagi asen lennirtem alizüker. Asenok state tejakleni odaktsütsü atema asenok mejangba nungi saktsü mapang tongja tongogo, ta paisa ashi.
ACAUT-i ochimashi ajak kakteter aser yimjak nung metetdaktsür. State sorkari mapa inyaktsü renema meliaka, ACAUT-i FIR benoktsü aser ozüng tapet ajanga sorkar anema mapa onoki mapa inyaktsü ta Khekiye-isa metetdaktsü.
Sentong nung Thepfulhouvi Solo, IFS (Retd), taoba NLA Speaker Z Lohe na dena lennir aikati ochimashi aser sorkar ketdangsübaren majungba anema jembi.
Telemtetbatem:
1. India sorkar dang Naga yimten tebilemtsü mapang talangka olemtep agia aruba nung telemtetba tajung ka agitsü atema yimten telok ajak jaoktsü ayongzüker. NNPG 6 sabang ka nung longjemba pelashishia agizüker ta rally nung adenertemi lemtet.
2. Nagaland sorkar dang July 26, 2017 nü Supreme Court-i obendang agütsüba nung ajemdaker ozüng alema shimba Advisors aser Parliamentary secretaries mapatem agientsü ayongzüker.
3. State sorkari September 2017 matongdang special NLA session ka jazüka Lokayuta Bill agizüktsü atema rally nung adenertemi takhangba agütsür.
4. Roads & Bridges department-i tang tashi nung agizüka aliba senotsü ajanga Nagaland nung gari lenmang aser aputem tangsatang yanglutsü ajungemotsü bangzünga renem.
5. Central investigative agencies nem totzü meyoktepa, PDS aser kerosene ochimashi ken o tem bushisüngdangtsü atema maneni takhangba agütsütsü lemtet.
6. K.R. Pillai indang rongsen aser Police Modernization Schemes nungi senotsü miimzüka agiba aser tanga tim masüba ken o tem CBI nem bushisüngdang südakjang ta rally nung adenertemi telemtetba agi.
7. NBCC aser tanga arogotemi clean election movement pusema nungittsü aser “ONE MAN ONE VOTE” yimyim nung ajemdaker pei shimnüba lennirtem shimtsü atema rally nung adenertemisa bangzünga renem.
Bangzüng tenet nung sign asürtem- Hotongse Sangtam (Eastern Nagaland Peoples Organisation), Lendinokdang (Naga Tribes Council), O.Shilu Jamir (Central Nagaland Tribes Council), Kevichatha Sechu (Angami Youth Organisation), Kenneth Rengma (Rengma Selo Zi), Nokshom Konyak (International Border Area Public Organization), Nchumbemo Ezung (Lotha Youth Hoho), Imkummeren (Mokokchung Town Lanur Telongem), Khevishe Zhimo (Zunheboto Town Youth Organization), Ate Venuh (Phek Town Youth Society),  Wonglong Konyak (Mon Chambers of Commerce and Industries), Zapu Sekhose (Kohima Chambers of Commerce & Industries), Neibulie Kiewhuo (All Kohima Municipal Ward Panchayat), Mhashivikho Zao (Dimapur Urban Council Chairmen Federation), Thungbemo Murry (Business Association of Nagas), Nitoka V Swu (Public Service Aspirants, Nagaland), Thefulhouvi Solo. IFS. Retd, Z. Lohe, Peter Rutsa, Dr. Khekugha Muru, C.Mongkum Jamir, Theja Therie, Mar Longkumer, Kitoho S Rotokha, Joel Naga aser Khekiye K Sema IAS Rtd.