ACAUT Pfutsero Unit-i aitsür

Dimapur, September 04 (TYO): ACAUT Pfutsero Unit Convener, Wezote Kreo aser Secretary Vikhrutu Leah nati sangdong ka ajanga, NSCN (R)-i sen akhangba, amokmerenba aser tashiyim amshiba ya “OJANG” aser shishilembaba mapa inyakba den Pfutsero Town, Nepali Baptist Church Pastor, Khrishna Ramauli dang sen akhangba aser amokmerenba tatalokbaji ACAUT Pfutsero Unit-i  kanga sashia aitsür, ta ashi.

“Yimjung aser Telongjem” maparen nung Naga yimtem mapa inyaker ajak aser Naga nunger ajak külemi noktaker mapang talangka nungi Naga nungeri yimten atema raraa aruba asoshi telatetba tajung ka dangi arutsü atema inyakba mapang ka nung August 31, 2015 nü Pfutsero jila nung prangpong agi tuiter sen 10,000 akhangba ajanga Pholami yim nungi Deputy Kilonser, Finance, Küzoveyi Kezo nunger ama nija kari kanga jashidaktsütsüsa inyakbaji ajanga NSCN (R) aser linük yimtenren nung inyaker ajak asoshi maksü bener arutsür, ta kasa sangdong ajanga ashi.

Pa ajanga tetsübu aitdaktsübaji Naga nunger telemtetba tajung ka dangi arutsü atema khenyongi amokmerenba ka lir. ACAUT Pfutsero Unit-i kanga sashia aitsür aser tarutsü nungbo item ama ozüng alema inyakba ya magizüktettsü, anungji Pfutsero nübur aser Naga nunger ajak ajungtsü mechi tarutsü nung telok kari mesüra nija kari ozüng alema inyakbatem anema khenyongi akhanga noktaktsü, ta ACAUT Pfutsero Unit-isa metetdaktsü.