ACAUT teloki SIT dak temulung malemer, NPF aitsür

Dimapur, July 17 (TYO) : Tawa Dimapur nung gari totzü den kerosene meyoktepba mapa putetba dak sendakba maparen bushisüngdangtsü asoshi state sorkari ” Special Investigation Team (SIT)” ka shim saka ACAUT teloki magizükba anema Police Headquarters aser NPF teloki sorkar tenüng nung jembibaji inyakyimji  shitak masü ta ACAUT teloki meyiper sorkar aitsüogo.
Government inyakyim nungbo Chief minister nem jung tonglokja jembitsübaji government tenüng nung jembir ka asütsüla mesüra Cabinet-i telemtetba agitsüla, ajisüaka tangbo Chief minister aser government tenüng nung Nagaland Police PRO-i jembir,  ibaji temenünütsüka lir ta ACAUT telokisa metetdaktsü.
ACAUT Nagaland-i governmenti shimba SIT dak temulung malembaji tajemdakdak makaba o ka dang süra, tamalen government-i shimba SIT teloki tatem tashi bushisüngdanger aibelena alir tepuokdak ayuba otsü ka danga lira, ibaji nübortem nem metetdakjang ta parnokisa metetdaktsü.
Ano, kasa maparen nung NPF Central ajanga ACAUT telok ya kari amshir ta aija metetdaktsübaji nübortem mashileni anitsü asoshi tiyazü jembiba mapa ka lir, ajisüaka nübortem tamashi masü ta ACAUT telokisa metetdaktsü.
Nagaland nung Food & Civil Supplies department ya Chief minister-i repranger aser nübortem asoshi aruba kerosene yoka achiba mapatemji pai reprangba department kübok inyaker ta ACAUT telokisa metetdaktsü.
State government aser NPF Central teloki shitakba gari totzü den kerosene meyokteper ayokba mapa ya tatem tashi bushitsü temulungtetba lira, iba mapa ya Central Bureau of Investigation (CBI) nem bushidaktsütsüla ta ACAUT telokisa metetdaktsü.
Gari totzü den kerosene meyokteper ayokba mapa ya tang tasen masü. Saka akhidang nungi inyaker ta ajaki meteta lir saka tangang putetter, anungji tamalen amato masü saka shitakba ochiobendang agütsütettsüla ta ACAUT telokisa metetdaktsü.