ACAUT teloki state government telemtetba aitsür

Dimapur, August 25 (TYO): Nagaland government-i tan August 11, 2016 nü Nagaland nung tatidang magii government mapa nung shima alir shirnoksa mapai irr küm asem ajunger, parnok ajakji ‘regularise’ sütsütsü lemtetba telemtetbaji okadak obendangertemi obendang agütsüba anema lir, ta ACAUT teloki metetdaktsüogo.
High court Obendangdak Atouzo Vs state of Nagaland ken o nung obendangertemi Nagaland nung tatidang magii sorkar mapai ia alir shinga “regularize'” masütsü asoshi August 5, 2016 nü obendang agüja lir aser iba osangji osangkakettem nung tejangja adokogo, anungji tang cabinet-i küm asem Nagaland sorkar mapa nung inyakertem ajak regular sütsütsü atema August 11 nü agiba telemtetbaji High court-i obendang agütsüba raksaba dang masü saka obendangertem mezüngmeshiba mapa tuluka asütsü, ta ACAUT telokisa metetdaktsü.
Tang tashi nung Nagaland nung government mapa meyirijang aika tatidang magi ser tejak repranga shimba purtemi lir, ibayongji tangar memenepi aliba kintem aika akoksaogo aser lanurtem aika mapa inyaknüseta tatidang agütsütsü maongka mengui mapang tajung ajak süiogo ta ACAUT telokisa metetdaktsü.
Iba amai kinunger apia aser ochimashiba len nungi government mapa nung tatidang magi aniokba ajanga zünger mapa bushir lanurtem aika akoksadagi, anungji parnok nema tatidang agütsütsü maongka agütsütsüla ta parnokisa ashi.
Aji oda, tatidang magi contract aser adhoc nung shimer ajunga regularize sütsübaji okadak nungi agütsüba obendang anema asütsü, anungji ibajibo nokdangtsü ta ACAUT telokisa metetdaktsü.