ACAUT tenteter küm 7 tashi nübortem asoshi inyaka arur

Dimapur, October 31 (TYO): October 31, 2013 nü City Tower, Dimapur nung ACAUT-i lokti sentong tulu ka ayongzüka agidang public-i bangzüng asem renema liasü.
Iba lokti senden nung “Sorkar ka Saru Ka” yimyim ayimoktsü aser bangzüng ka ama agizüka liasü. Naga nunger tsüngda meputep adokba onüktem rongnung sarusaji onsara asüba ya ka lir, ta ACAUT Chairman Tia Longchar aser Secretary Hetoi Chishi nati sangdong ka nung ashi.
Ajisüaka, public-i aginüba anema sarusaji onsara saruba manenba agi October 31, 2018 nü Naga Council kübok Public Action Committee (PAC)-i ayongba Public Rally nunga “Sorkar ka Saru Ka” onük nungsa ammet, ta ACAUT-i metetdaktsü.
Oct 31, 2013 nü bangzüng renembatem rongnung tanabuba onükji High Powered Commission (HPC) ka tentettsüba liasü. Iba HPC ya sorkari justice HK Sema lenisüba kübok tentettsü aser parnoki 2015 nung report agütsü. Ajisüaka, tanü tashi HPC-i agütsüba report atema executive order kecha mali, ta parnokisa ashi.
Iba anogo tasembuba bangzüngji Indo-Naga yimjung olemtep tekaraba nung tembangtsüba liasü. Iba sülen ACAUT-i September 12, 2015 nü Common Platform ka ayonga agi. Iba ya Framework Agreement sign asüba anema liasü kechiyong Naga National Political Group ajak külemi melongjemra, telemtetba kechi agidir agiaka ibaji kar ajung atema dang asütsü ta ajaki bilemer, ta ACAUT-isa metetdaktsü.
August 27, 2017 nü “ACAUT Mother of all rallies” nung public-i bangzüng ka renema liasü aser ibaji India sorkar dang Naga yimten telok ajak jaoker, yimten maparen tekaratiba nung angatetteptsü atema ayongzüktsüba liasü.
Naga loktiliba nung Naga yimtsüngtem ya tashi amertem lir aser Naga yimtsüngtem külemi ola adokbaji tatembang telemtetba aser Naga nungeri Referendum ka ajanga Naga yimten tebilemtsü ya latettsüla ta ACAUT-isa metetdaktsü.
Taoba küm 7 tashi ACAUT-i nübortem atema ola adoka arur aser maneni yamaji inyaktsü. Tanen makai sarusajiba aser ochimashi manendaktsü tashi onoki raratsü, ta ACAUT-isa nenshia metetdaktsü.