ACAUT ya telungpurtem anema noktaktsü atema tentetba masü

Dimapur, June 15 (TYO) : June 13, 2016 nü NSCN-IM-i ACAUT aija sangdongba nung ajemdaker ACAUT Nagaland-i tanü sangdong ka nung ACAUT ji nübortem indang maparen ka lir anungji sempaba agi iba mapa mesamadaktsütettsü, ta metetdaktsü.
Telungpur telok balalai saru saruba ya Naga nunger sasep indang khuret ka ama ACAUT Nagaland-ibo bilemer saka NSCN-IM-i iba onük ya Naga Yimten Tebilemtsü den sendaktepba aser tiyazü otsütem purateta jembiba agi alaker, kechiyong NSCN(IM) nung züngsemtem ajak dena nisung ajaki ACAUT-i India nunger den tesentaktep yua mapa inyaker ta asübaji tiyazü ta meteta lir, ta Media Cell, ACAUT Nagaland sangdong ka nung ashi.
NSCN-IM mesüra tanga teloktem anema noktaktsü atema ACAUT tentetba masü. Tangatetba shitak alirtemi kodaser Naga nunger nüjiso atema raraba teloktem anema noktaktsü? Tashitait Indian army-ia Naga nunger telungpur teloktem mesamatsütet, anungji tashi temetetter aliba NSCN-IM teloki ACAUT ji NSCN-IM anema noktaktsü atema tentet ta mesüra Army General aser retired bureaucrats-i yaria ACAUT tentet ta nüngdak maliba otem mejembitsüla, ta sangdong nungsa shia lir.
Nübortem teimla samaba ajanga ACAUT ya tentettsüsa aküm. Telungpur teloktem tsüngda rara aser saru saruba anendaktsütsü atema nisung 40,000-i yimjak nung ‘Sorkar Ka Saru Ka’ ta yimyim agütsü aser iba yimyim nung ammet ta NSCN-IM-i metettsüla.
Naga nungertemji pei linük memeirtem lir aser iba jagi October 31 nü public rally nung Naga nungertemi India sorkar dang Indo-Naga onük lemtettsü atema tayongzükba agütsü. Anungji, ACAUT Nagaland ya Naga nunger anema inyakba maparen ka masü ta kuli sayur. ACAUT-i Naga nüjiso atema inyakba mapa nung telemsa adoker samatsütsü meranger ta NSCN-IM-i aitsübaji nisung shingaia magizüker. Ochi jembidi süra, telungpur teloktemi ang Naga nüjiso atema inyakba mapa nung telemsa adokdaktsü aser samatsü,
NSCN-IM-i India sorkar den olemtep aliba nung ACAUT-i tetsükdaktsü aludaktsütsü atema tebilemba kecha mali aser Framework Agreement agiba osang sangdongba sülen India Prime Minister dang pai Naga Yimten tebilemtsü atema nendaka inyakba atema tenüngsang agütsürtem rongnung ACAUT mezüngpurtem den dena liasü. ACAUT-i telongjem atema aser ajak dendaktsütsü atema dang jembia arur.
Nübortemi Naga nunger telungpur teloktem dang mepelar, anungji ACAUT noktanger ta mejembii NSCN-IM aser tanga teloktemi ACAUT ya teyariteper ka ama bilema public indang tejashi süngjemdaktsütsü aser iba tejashi jagi linük meimba tangatetba kümdakja ‘Sorkar Ka Saru Ka’ ta taginüba tongtettsü aser Naga nunger ajaki agizüktettsüsa telemtetba ka agitsü atema inyakdaktsünür, ta ACAUT sangdong nungsa metetdaktsü.

You must be logged in to post a comment Login