ACAUT züngsemtemi Lokayukta standing committee ajuru

Kohima, August 18 (TYO): August 17, 2016 nü ACAUT-i Nagaland Legislative Assembly (NLA)-i tentetba Lokayukta Standing Committee ajurua Nagaland Lokayukta Act tatembangbuba draft nung inoksemtsü atema onük kar agütsüogo, ta tanü Media Cell ACAUT Nagaland-i sangdong ka ajanga metetdaktsü.
Standing Committee Chairman, Er. Levi Rengma leniba nung züngsemtem- C. Apok Jamir, R. Tohanba aser  Dr. TM Lotha nungeri, iba ama mapang ka nung Nagaland Lokayukta Act alitsü nüngdaka kümogo, ta ashiba den külemi yimtenren tajangzük atema iba tentet ya tim mesüi amshitsüa akok ta tarendakba olen ka ashi.
ACAUT-i, Lokayukta ya ano State Vigilance Commission amai tashi maliba tentet ka makümtsüla, kong tashiji State Cabinet-i agi, ta metetdaktsü.
ACAUT-isa Standing Committee dang Lokayukta nung züngsem akümtsü atema kobi melii mapa nungi anisüngzüktsü aliba tongti ketdangsertemi merangtsü akok, ta tekümdangtsü ashi.
Anungji, sorkar den tesentaktep tajung aliba ketdangsertem nem sempet agütsür ama ozüng dak sendakba tentet aser ozüng ajanga tentetba telok balala nung züngsem kümdaktsüba mapa meinyakdaktsütsü atema sorkar ketdangsertem mapa nungi anisüngzükba sülen telok kecha nunga meshimi, tajemba agi küm pongubosa anisüngzükdaktsütsüla, ta ACAUT-isa Committee dang metetdaktsü.
ACAUT-isa Committee dang, Lokayukta aser Arla 371 (A) na tesentaktep kecha mali, anungji Lokayukta ajanga Arla 371 (A) ajembanger ta asüba onükji tajemdakdak mali. Nisungtemi aiben Arla 371 (A) ya pei ajangzüktsü atema tai meyipzüka amshir, ta ashi.
ACAUT-isa, “Nagaland Lokayukta Act ya ajanga chichia Naga nunger mylungsüdaktsütsüla, iba ya ajanga talenba kecha makai ochimashi ayimsünga inyakba azüoktsüla. Lokayukta indang tatembangbuba draft nung tashimait alitsü tebilemtsü kaa  Committee dang taruba asükwa mongpu Nagaland Legislative Assembly nung iba ya magizükdang draft ji nüburtem dang mezüng sangdongtsü mepishir,” ta Media Cell ACAUT Nagaland sangdong nungsa shia lir