ACCC, 2 Dimapur II-i nenshia metetdaktsür

Dimapur, September 25 (TYO): 2010 küm Indian National Congress (INC) temzüng nung ajemdaker Assembly Constituency Congress Committee (ACCC), 2 Dimapur II nung tang teinyakdak mendenpurtem shimogo, ta Hokolbarnü ACCC, 2 Dimapur II-i nenshia metetdaktsüogo.
Nisung kari telok tenüng amer INC temzüng nung aliba inyakyim anema osangkakettem ajanga dang suspension order agütsü aser ibaji ACCC, 2 Dimapur II-i magizüker, ta ACCC, 2 Dimapur II kübok tongti telok ajak rongdak senden ka nung telemtetba agi.
Tanü senden nung adenertemisa tang tenteta aliba mendenpurtem temzüng anema agientsü merangba mapa anema noktaktsü bangjemtep, ta tatong tir, P. Thungdemo Tungoe aser tongti tezülur Limawati Imchen nati külem sangdong ka nung metetdaktsü.
Nisung kari pei ajungtsü asaa aser tashiyim amshia ACCC nung peii saklokba ketdangpurtem shima telok ketdangsüba melenshitsü merangba mapa kükua aitsür, kechiyong INC kübok Pradesh Congress Committee-i pei pei sasep nung party ketdangsüba memelenshitsü atema tetuyuba agütsüogo, ta sangdong nungsa shia lir.
ACCC, 2 Dimapur II senden nung adenertem maneni party tangatetba nung noktaktsü aser party atema inyaktsü bangjemtep, ta sangdong nungsa metetdaktsüogo.