Acharya aser Rio nati asür Yazokie mang ayimer

Dimapur, August 24 (TYO): IPR Additional Director, Dominic Yazokie August 24, 2017 nü asüba osang angashia aoksar aser asükhu lemsateper, ta Nagaland aser Arunachal Pradesh Angh, PB Acharya-i metetdaktsü.
Asür Dominic Yazokie kinungtsü Mrs. Ako Nakro dangi züluba shidi ka nung Angh-i ashiba agi, “asür Dominic-i mapang talangka Raj Bhavan, Kohima den tesentaktep liasü aser PRO to the Governor of Nagaland inyak.”
“Asür Yazokie-i iba lima toktsür aobaji IPR Department atema dang masü saka Nagaland sorkar atema takoksa ulura lir. Nür kibong den asükhu lemsateper aser Tsüngremi nenok nem tashi aser tesünep agüjang ta sarasademtsür” ta Angh-isa ashi.
Nagaland MP, Neiphiu Rio-ia sangdong ka nung Bethesda Hospital, Kohima nung Additional Director, IPR Dominic Yazokie asüba osang angashia temulung raksar ta metetdaktsü.
Pa Delhi nung PRO ama inyakdang Naga kaketshir aika asoshi tebu ka ama liasü aser pai menden balala nung sorkar aser nübortem takok ngua tenzükogo, ta Rio-isa sangdong shia lir.
Asür Yazokie-i akümli toktsür aobaji sorkar aser Nagaland nung alirtem asoshi takoksa ulura lir. Pa ama takotet aser aika ajangshia aruba ketdangser kati asenok toktsür aobaji takoksa ulura lir, ta paisa shisem.
Iba asükhu mapang ni, kü kinungtsü aser ozü kibongi tasür kibong den mangyim tejashi lemsateper aser Tsüngremi nenok mulung sünepjang aser tashi agüjang ta sarasademtsür, ta Rio-isa metetdaktsü.