Acharya-i ”Economic History of the Miris’ kaket sayatsü

Guwahati, Aami/June 17 (TYO): Assam state putiotsü nung ano terenlok ka bendenloksema Amongnü (June 16, 2019) GU-IST Hall, Gauhati University nung Nagaland Angh, PB Acharya-i ”Economic History of the Miris” (Mishings) ta ser kaket ka sayatsüogo, ta tanü PRO to Governor-i sangdong ka ajanga metetdaktsü.
Peter Pegu-i züluba kaket nung tesüiba küm 3000 nung Mishing tribe indang rongsenkettsüng jenjang balala study asüba indang shia lir.
Iba kaket sayaba sentong nung jembidang Angh, Acharya-i shisaliok mapa nung loktiliba tesendaktep kanga nüngdakba indang lemsatep.
Paisa kaket zülurtem aser research agirtem dang pei shisaliok mapa agi linük yangerba nung shilem agitsü ayongzük.
Kakettem ajanga nisung meimchirtem melungjang nung kanga kongshir, anungji kakettem nung India ama nübur telemsa balala ajak ka küma longjema aliba indang rajemtsütsüla, ta pai ashi.
”Economic History of the Miris” kaket indang lemsatepa Acharya-i, ojang mesüra tribe nüngjaji masü ajisüaka kaket nung shia aliba tongtibang onüktem nung rangloktsüla, ta ashi.
Iba sentong nung jembidang Gauhati University Vice Chancellor, Prof. Mridul Hazarika-i, Mishings densema North East region nung kin balala indang oshiopen aser sobaliba jenjang balala indang research agiba Gauhati University nung iba kaket agi kanga melung asüba indang lemsatepa liasü.
Paisa, ”Economic History of the Miris” kaket ajanga onük balala nung research agirtem kanga tajangzük angutsü, ta ashi.
Sentong nungsa Ruwad Educational Trust Chairman, S. S. Pegu-i kaket nung keta alibatem lemsatep aser kaket züluri osang aika bendena kaket nung züluoksemba atema pelaba metetdaktsü.
Gauhati University Registrar, Prof. Nani Gopal Mahanta-i, ”Economic History of the Miris” kaket ya Assam nunger shisashirtem atema berem-long ka ama asütsü, ta ashi.
Kasa sentong nung Brig. (Retd.) Abani Pait-i, putu aika Mishing tribe nunger rongsenkettsüng jenjang indang amadoker aliba aika kakteta bushiba atema kaketzülur dang pelaba lemsatep.
Sentong tetenzüklen kaket zülusang, Peter Pegu-i iba kaket indang tongmelang agi metetdaktsü.
Iba sentong ya Dr. Rajeev Coley leniba nung agi aser sentong nung Gauhati University nung azüngertem, shisashirtem aser state nungi tongtibang nisung aika dena liasü.