Acharya, Rio aser BJP Nagaland-i Ananth Kumar mang ayimer

Dimapur, Yimpoksüi (November) 12 (Agencies): Modi’er Cabinet nung Minister for Chemicals & Fertilizers and Parliamentary Affairs. Ananth Kumar ajungbena asüba osang angashia kanga aoksar, ta Nagaland Governor P.B Acharya-i ashi.
Pa ya nüngtugu lennir ka liasü aser tongtipang Bangalore Constituency nungi trokben atongtepa takok angu. Ananth Kumar ya kü medemer tajung ka liasü aser Akhil Bharatiya Vidyarthi Parishad (ABVP) telok nung alidang nungi küna metettepa liasü. Pa asübaji kü atema takoksa ulura lir, ta Acharya-isa ashi.
Akhil Bharatiya Vidyarthi Parishad (ABVP) nung activist ka ama pa 1985 küm National Secretary aküm aser Karnataka nung nüngtugu kaketshir lennir la liasü. Pa BJP nung aden aser Bharatiya Janata Yuva Morcha nung State President akümba sülen 1996 küm National Secretary inyaktsü shim, ta Acharya-isa shisem.
Atal Bihari Vajpayee’er sorkar nung asür Anath Kumar-i Civil Aviation Minister inyak aser NDA kübok Ministry aika nung menden balala mapa inyak. Tourism, Sports & Youth Affairs, Culture, Urban Development & Poverty Alleviation ministry tem nung pai takok ngua inyakogo, ta Nagaland Governor-isa metetdaktsü.
Pa ajungbena asübaji linük atema aser talisa Karnataka State atema takoksa tulu lir. Ni tasür kibong den asükhu lemsateper aser tulusangji parnok nem tashi agüjang aser sünepjang ta sarasademtsür ta paisa shisem.
Union Minister aser parliamentarian tejen H.N. Ananth Kumari asüba osang angashia temulung raksar, ta Nagaland Chief Minister Neiphiu Rio-i ashi.
“Asür Ananth Kumar ya yimten ketdangser tajung ka liasü aser pai ketdangsüa inyakba Ministry tem kanga junga len anir. Pai inyaktetba mapatem rongnung fertilizer sector nung Neem Coated Urea tenzükba aser pharmaceuticals sector nung mozü aser implants jenjang ajembatem liasü” ta Rio-i sangdong ka nung ashi.
May 2014 nungi February 2018 tashi 16 buba Lok Sabha nung ni pa den külemi inyaksema aruba menungra bilemteter. North East nung alirtemi pa bilemteter kechiyong pai Guwahati nung National Institute of Pharmaceuticals Education and Research (NIPER) campus lapoktsü telemtetba agi. Pa asübaji Karnataka nunger aser linük atema takoksa tulu lir, ta paisa shisem.
Ni asür Ananth Kumar’er kibong den asükhu lemsateper aser Tsüngremi parnok nem tashi agüjang ta sarasademtsür. Maneni, asür tanüla teti anisüngzük ngudakjangma, ta Neiphiu Rio-ia metetdaktsü.
Ozü lennir tejen aser Union Minister Shri Ananth Kumar anojungi iba lima toktsür aoba atema temulung raksar, ta Nagaland State Bharatiya Janata Party (BJP)-i metetdaktsü.
Asür Ananth tanep Bengaluru nung asür. Pa arishi küm 59 liasü. Pa lung cancer agi shiranga aru aser taoba ita tuang New York nung temang anepaluba sülen meyipa aru, ta Media Cell BJP Nagaland sangdong ka nung ashi.
Pa ya nübor lennir, parliamentarian tejen aser sentong atonger tajung ka liasü ta party-i teti bilemtettsü. Pa ya kanga dang meranga inyakba MP ka liasü aser pai mapa inyakba ajanga Bengaluru South ya model constituency ka lir, ta parnokisa metetdaktsü.
Nagaland State BJP President & Higher and Technical Education Minister Temjen Imna Along-i anir party züngsem ajaki tasür kibong den asükhu lemsateper aser Tsüngremi nenok sünepjang ta sarasademtsür. Pa tanüla teti anisüngzük ngudakjangma, ta Media Cell sangdong nungsa shia lir.