Acharya & Rio nati ochimashi agientsü ayongzüker

Dimapur, Mongputeni (October) 28 (Agencies): Ochimashiba ya asüngteta aliba mesüra pei tangatetba samaba lir aser iba ajanga asenok tajung nungi piladaktsür ta Nagaland governor P B Acharya-i Deobarnü ashi.
Linük den külemi Nagaland nunga Hombar nungi Vigilance Awareness Week amungtsü lia Acharya-i osang lemsatepdang, “ochimashi kanga inyaker aser asen loktiliba nung kanga bulua inyakteper,” ta ashi.
“Tanü ochimashiba ya taküm yimya ka ama kümdaktsüogo aser loktilibai agizüker. Pei angutsü rongsen dak alia anguba atema nisung shingaia tai mapur aser mashishir” ta Governor-isa shisem.
Süpokrem, tashiyim agi sen meshiba, tenüng menüktsütsü amokmerenba, ashikülakba, sen tim mesüi amshiba, nübortem indang temeten anema inyakba amalatemji ketdangsübaren nung ochimashiba lir. Iba khuret ajanga rongsenkettsüng renlokba, tesayuba tajungtem aser temeten asoshi lendong bentsür arur aser loktiliba nung takar aser sensaker tepila adokdaktsür, ta paisa metetdaktsü.
“Inyaksangshi mita mesüra kanga kümdanga tenük yoka reprangtsü atema asenoki longjemtsüla aser ochimashi anema raratsü atema bendanga agütsüshitsüla. Sendaktepa alir ajaki posema menungitra aser meyaritepra, asen loktiliba nungi ochimashi magientettsü” ta Acharya-isa ayongzük.
Chief Minister Neiphiu Rio-ia Vigilance Awareness Week osang sangoktsüba nung par sorkari tashishitsü melii ketdangsütsü meranger ta ashi.
Ketdangsübaren nung ochimashi agientsü atema onoki mapa inyaker aser nübortemi ajuruba tebilemtsütem koktettsü atema meranger, ta Rio-i ashi.
Nagaland nung People’s Democratic Alliance (PDA) sorkari ochimashi anema zero tolerance policy ka yanglutsü ta paisa nangzük.
“Ochimashi maliba state ka kümdaktsütsüba sorkar kijai meinyaktettsü. Temelenshi bener arutsü atema senso ajaki shilem agitsüla” ta chief minister-isa ashi.
Rio-isa sensotem dang ochimashi agientsü aser India tasen ka yangerba wadang nung senso ajaki shilem agitsü atema ayongzük.