Achimajemertem atema Khensa Arogo-i detox sentong katsür

Mokokchung, Monupii 18 (TYO): Khensa Baptist Arogo-i ayongzüka tang agi pezübenbuba ‘Detox Follow-up’ ta sür achimajemertem atema sentong ka “melenshinüba taküm aser kibong” omen nung ajemdaker Monupii/May 17 nungi tenzüka Mongoya Prayer Centre Chuchuyimpang nung katsüdar. Iba sentong ya Monupii/May 20 nü tashi akatsü.
Iba sentong nung nisung 57-i shilem agia mungdaki. Sentong nung tongti o jembirji Dimapur Ao Baptist Arogo (DABA) nungi Dr. Moa Imsong lir aser pa den Bendangba (Dimapur), Watiba (Dimapur) aser Imo Jamir (Dimapur) par asemi yaritepdaki.
Achiajemba tebilemtsü ya kija-kibong khuret dang masü saka ibai arok khuret ta angateta arogo-ia rongsen indok mesasai iba sentong ya tang agi pezübenbuba katsür aser iba ya “rangben tekümtet” (total salvation) dak rangloker ayonger, ta Khensa Baptist Arogo Pastor K.Temjeni iba osangbener den jembidang metetdaktsü.
2016 küm nungi tenzüka iba sentong kayonga arudang, yangi adenertem nungi telangzüba tajung aika ngua kanga pelaa bilemer, aji oda, yangi amunger karbo nisung tajung kümer arogo tenzükba wadang balala nung nokdaka lir, ta Pastor Temjen-isa temoatsü kar lemsatepa liasü.
Detox sentong agiba dang masü saka iba ya metemi bener aotsü atema arogo-i achayanga item pur asoshi Alcohol Anonymous (AA) ta sür telungjem ka tentetja lir, mapang shia parnokji ajurutepa telungjem sarasadem den sentongtem akar aser iba ajanga parnok tsüngda kati ka tanela nung ajungshiteper, ta paisa ashi.